1 qańtardan bastap satýshylar men óndirýshiler ár taýarǵa 13 tańbaly kod engizýge mindetti
ASTANA. KAZINFORM — 2026 jyldyń 1 qańtarynan bastap Qazaqstanda aınalymǵa túsken ár taýarǵa Ulttyq taýarlar katalogyndaǵy (UTK) NTIN kod engiziledi.
Bastamany iske asyryp jatqan Qarjy mınıstrligi men Saýda jáne ıntegratsııa mınıstrliginiń ókilderi bul shara taýar aınalymyn ashyq ári senimdi etetinin aıtyp otyr.
Atalǵan vedomstvolar Qazaqstanda Ulttyq taýarlar katalogyn (UTK) engizip, ár taýarǵa biregeı NTIN kod berýge daıyndalyp jatyr. Buryn bir taýar ártúrli júıelerde árqalaı atalatyn. Mysaly, aqparat júıesinde «sútti sýsyn», ekinshisinde «aıran», al memlekettik satyp alý portalynda «qyshqyl sút ónimi» dep jazylatyn. Mundaı alshaqtyq aqparattyń shatasýyna, qatelerge jáne ýaqyt joǵaltýǵa ákeletin.
— Bul 13 tańbaly kod taýardyń búkil ekojúıede tanylýyn qamtamasyz etedi. Ol kod bolmasa, elektrondyq shot-faktýra men súıemeldeý júkqujaty rásimdelmeıdi, kassalyq chek pen kedendik resimdeý múmkin bolmaıdy, — deıdi Saýda jáne ıntegratsııa mınıstriniń orynbasary Áset Núsipov.
Bul 13 tańbaly kodty taýardyń «tsıfrlyq pasporty» dep ataýǵa bolady. 13 tańbaǵa taýardyń ataýy, quramy, tehnıkalyq jáne tutynýshylyq sıpattamalary, ólshem birligi, óndirýshisi jáne shyqqan eli týraly derekter jasyrylady. NTIN kod arqyly býhgalterııa, logıstıka, kassa, keden jáne statıstıka birdeı derek alady.
— Bıznes úshin bul júıe ýaqyt pen resýrsty únemdeýge, qatelerdi azaıtýǵa, ımport pen eksport rásimderin jedeldetýge, brendti qorǵaýǵa múmkindik beredi. Memleket úshin naryqtyń ashyqtyǵy artyp, kontrafakt joly qysqarady, retteý saıasaty naqty derekke súıenedi. Tutynýshylar tolyq aqparatqa qol jetkizip, ónimdi kóshirmeden aıyra alady, — deıdi Saýda jáne ıntegratsııa mınıstrligi Taýarlardy tsıfrlyq transformatsııalaý jáne tańbalaý departamenti dırektorynyń orynbasary Áset Óteǵalıev.
Ortalyq kommýnıkatsııalar qyzmetinde ótken baspasóz máslıhatynda memlekettik organ ókilderi bul júıe kezeń-kezeńmen engiziletinin, 13 tańbaly kod engizý mindetti bolǵanmen, ony oryndamaý eshqandaı jazalaý sharasyna, aıyppulǵa ákep soqpaıtynyn basa aıtty.
Budan buryn kelesi jyldan bastap Ulttyq taýarlar katalogyn qoldaný mindetti bolatynyn jazǵan edik.