1 qańtardan bastap poshtamen sálemdeme jiberý tártibi ózgerdi
ASTANA. QazAqparat - 2019 jyldyń 1 qańtardan bastap poshta arqyly jóneltiletin jeke tulǵalardyń barlyq sálemdemeleri men hattary ashyq kúıinde qabyldanady, dep habarlaıdy QazAqparat tilshisi.
«Jeke tulǵalar jiberetin barlyq tirkeletin poshta jóneltilimi «Poshta týraly» QR Zańynyń 39-baby 2-tarmaǵyna sáıkes ashyq kúıinde qabyldanady (tirkelmeıtin hattardy qospaǵanda). Zańdy tulǵalardyń hat-habarlary burynǵysha ashyq jáne jabyq kúıinde qabyldanady», - delingen «Qazposhta» AQ baspasóz málimetinde.
Belgili bolǵandaı, budan bylaı barlyq tapsyrys hat, banderol jáne qundylyǵy jarııalanǵan hat, sondaı-aq sálemdemeni poshta baılanysy bólimshesine ashyq kúıinde ákeledi. Bul rette, poshta operatory poshta jóneltilimderin qabyldaǵanda, jóneltýshini sáıkestendirýi jáne onyń derekterin tirkeýi kerek.
Sonymen qatar, jóneltýge tyıym salynǵan zattardyń mazmuny úshin sálemdemelerdi tekserýdiń múmkin bolmaýyna baılanysty bul qyzmet poshta bólimshelerinde júrgizilmek.
Baspasóz qyzmeti, jalpy bul sharalar poshta qyzmetkerleriniń densaýlyǵy men qaýipsizdigi úshin jasalyp otyrǵandyǵyn aıtýda.
