1 qańtardan bastap kiris deklaratsııasyn tapsyratyndardyń qataryna 3,9 mln adam qosylady
Qarjy vıtse-mınıstri Erjan Birjanov 2025 jyly kúshine enetin Salyq kodeksi talqylanǵan jıynda 1 qańtardan bastap salyq tóleýshiler úshin qandaı ózgerister kúshine enetinin túsindirdi, dep habarlaıdy Kazinform.
«Qazirgi tańda Ulttyq ekonomıka mınıstrligi salasynda úlken jumys júrgizilip jatyr. Bul jańa kodeks 2025 jyldan bastap iske asady. Qazirgi bastapqy baptaryn talqylap júrmiz. 2024 jyldyń 1 qańtarynan bastap jalpyǵa birdeı deklaratsııanyń úshinshi kezeńi bastalady. Bul úshinshi kezeńde jeke kásipkerler men zańdy tulǵalardyń quryltaıshylary kiris deklaratsııasyn tapsyrý kerek. Bul – 253-shi nysana. 1 qańtardan 15 qyrkúıekke deıin tapsyrý kerek. Onda búkil aktıvterin kórsetýge tıis. Tapsyratyndardyń sany – 3,9 mln adam», - dedi Erjan Birjanov.
Vıtse-mınıstr 2024 jyldan bastap arnaıy salyq rejımderinde ózgerister bolatynyn atap ótti.
«Mysaly, shyny ydys satýmen aınalysatyn jeke kásipkerler buryn jalpyǵa birdeı rejımmen jumys isteı alatyn. 1 qańtardan bastap ol kedergi alynyp tastaldy. Bizde Ulttyq banktiń notalaryna salyq jeńildikteri bar bolatyn. Ol jeńildik te alynyp tastaldy. Taǵy jeke tulǵalardyń borysh júktemeleri kóp. Sony ońtaılandyrý úshin olardyń salyq mólsherlemesi bolmaıdy degen norma engizildi. Sondaı-aq, jeke tulǵalardyń bonýstary bul deklaratsııada kórsetilmeýi kerek degen norma da engizildi. Sol sııaqty biraz norma bar. Kóbi jeńildiktermen baılanysty. Kelesi jyldan bastap iske qosylyp jatyr. Negizi salyq júıesindegi túbegeıli ózgerister 2025 jyldan bastap qoldanysqa enedi», - dedi mınıstrdiń orynbasary.
