1 qańtardan bastap dárilik zattardyń baǵasy retteletin bolady
Baspasóz málimetterine qaraǵanda, Elbasynyń «Qazaqstannyń úshinshi jańǵyrýy: jahandyq básekege qabilettilik» Joldaýyn iske asyrý maqsatynda QR Densaýlyq saqtaý mınıstrligi «Dárilik zattar men medıtsınalyq buıymdar aınalymy máseleleri boıynsha QR keıbir zańnamalyq aktilerine ózgerister men tolyqtyrýlar engizý jónindegi» QR Zań jobasy ázirlendi. Onda 2019 jyldyń 1 qańtarynan barlyq dárilik zattar baǵalaryn retteý kózdelgen.
Dárilik zattardyń baǵalaryn qalyptastyrýdaǵy josparlanyp otyrǵan ózgerister baǵany retteýdiń 4 deńgeıin kózdeıdi: óndirýshi, kóterme saýda, bólshek saýda, sondaı-aq tegin medıtsınalyq kómekti kepildi kólemi (TMKKK) sheńberinde jáne mindetti áleýmettik medıtsınalyq saqtandyrý (MÁMS) júıesinde satyp alý deńgeıleri.
Óndirýshiniń baǵasyn tirkeý referenttik elderdiń tutynýshylyq oramynyń baǵasy negizinde júrgiziledi, sondaı-aq ústeme baǵanyń regressıvtik shkalasy arqyly dárilik preparattardy kóterme jáne bólshektep satý marjasy retteletin bolady.
Qazirgi tańda atalǵan Zań jobasy QR Parlament Májilisiniń qaraýynda, jaqyn arada ol ekinshi oqylymǵa kirgiziledi jáne QR Parlament Senatyna joldanady. Aǵymdaǵy jyldyń sońyna deıin zańǵa qol qoıý josparlanýda.
Odan basqa, Mınıstrlikn 2017 jyldyń basynan TMKKK sheńberinde ambýlatorııalyq deńgeıde turǵyndardy tegin dárilik zattarmen qamtamasyz etý úshin farmatsevtıkalyq qyzmetter men dárilik zattar, medıtsınalyq buıymdar tizbesin ortalyqtandyrýdy esepke alý men Biryńǵaı dıstrıbıýtor tizimi tolyqtaı qaıta qaraldy.
Atap aıtqanda, ambýlatorııalyq turǵyda tegin qamtamasyz etý úshin dárilik zattar tizbesi ekonomıkalyq jaǵynan tıimdi preparattardy qosý jolymen qaıta qaralyp, keńeıtildi. Mysaly, S vırýstyq gepatıtin emdeý úshin qymbat turatyn jáne tıimdiligi tómen (60%) pegılırlengen ınterferondarmen terapııa tıimdiligi joǵary (98%) emdeý shemasymen (sofosbývır+daklatosvır) almastyryldy, ol emdelgen naýqastar sanynyń 500-den 40 000 adamǵa joǵarylaýyna múmkindik berdi.
Sonymen qatar, dárilik zattardy sheteldik óndirýshilermen júrgizilgen kelissózder nátıjesinde 175 atalymdaǵy medıtsınalyq preparattar baǵasy ortasha 23%-ǵa tómendedi, al otandyq óndirýshiler uzaq merzimdi sharttar aıasynda baǵany tómendetý jónindegi qabyldanǵan mindettilikke sáıkes, 134 atalymdaǵy dárilik zattar baǵasyn 5% tómendetti.
Qazirgi tańda dárilik naryq dárihana arqyly dárilik zattardy kommertsııalyq satý jáne tegin medıtsınalyq kómektiń kepildik berilgen kólemi sheńberinde tegin dárilik zattarmen qamtamasyz etý bolyp bólinetinin atap ótken jón. Búgingi kúni naryqtaǵy kommertsııalyq satý baǵasy rettelmeıdi.