1 qańtardan 45 eldiń azamaty Qazaqstanǵa vızasyz kele alady
ASTANA. QazAqparat - 2017 jyldyń 1 qańtarynan bastap, 45 eldiń azamaty Qazaqstanǵa vızasyz kele alady. Bul týraly búgin Ortalyq kommýnıkatsııalar qyzmetindegi brıfıngte elimizdiń Syrtqy ister mınıstri Erlan Ydyrysov málim etti, dep habarlaıdy QazAqparat.
«Búgingi tańda vıza rásimdeýsiz-aq Qazaqstanǵa 19 eldiń azamattary kele alady. Al 2017 jyldyń 1 qańtarynan 45 eldiń azamattary osyndaı múmkinshilik alady. Olardyń qatarynda Ekonomıkalyq yntymaqtastyq jáne damý uıymynyń, Eýropalyq odaqtyń músheleri, sonymen qatar Birikken Arab Ámirlikteri, Malaızııa, Sıngapýr sııaqty elder bar», - dedi ol.
Osy rette mınıstr 2017 jyldyń 1 qańtarynan bastap kúshine enetin sheteldik azamattarǵa arnalǵan Qazaqstan Respýblıkasynyń vızasyn berý jáne shaqyrýlardy rásimdeýdiń jańa erejesi dıplomatııalyq korpýs ókilderine berilgendigin aıtty.
«Vıza rejimin yryqtandyrý maqsatynda qabyldanǵan sharalar bizdiń elimizdiń ulttyq múdesin eskere otyryp júrgiziletindigin atap ótkim keledi. Joǵaryda atalǵan memleketterden bólek taǵy 19 eldiń azamattary qol qoıylǵan ekijaqty kelisimderdiń negizinde vıza talaptarynan bosatylady. Mundaı kelisimderge basqa da memlekettermen qol qoıý úshin kelissózderdi jalǵastyra beretin bolamyz», - dedi Ydyrysov.
