1 qańtardaǵy derekterge sáıkes Qazaqstan halqy 16,4 mln. adamdy qurady
ASTANA. 21 aqpan. QazAqparat - 1 qańtardaǵy derekterge sáıkes Qazaqstan halqy 16,4 mln. adamdy qurady. Bul aqparatty QR Statıstıka agenttiginiń baspasóz qyzmeti taratyp otyr.
«2011 jyldyń 1 qańtarynda elimizdegi halyq sany aǵymdaǵy derekter boıynsha 16,4 mln. adamdy qurap, ótken jyldyń 1 qańtarymen salystyrǵanda 1,5 paıyzǵa ósti. Halyq sanynyń eń joǵary ósimi Ońtústik Qazaqstan oblysynda (52686 adamǵa), Astana (47737) jáne Almaty (35457 adamǵa) qalalarynda, al onyń azaıýy - Soltústik Qazaqstan oblysynda ( - 3605 adamǵa) baıqaldy», - delingen baspasóz habarlamasynda.
Vedomstvonyń atap ótýinshe, respýblıkanyń Mańǵystaý, Almaty, Aqtóbe jáne Atyraý oblystarynda, Astana men Almaty qalalarynda halyq sany kóshi-qon jáne tabıǵı ósim esebinen, al Ońtústik Qazaqstan, Jambyl, Qyzylorda, Qaraǵandy, Batys Qazaqstan, Pavlodar oblystarynda tek tabıǵı ósim esebinen kóbeıgen. Soltústik Qazaqstan, Aqmola, Qostanaı, jáne Shyǵys Qazaqstan oblystarynda halyq sany osy óńirlerdegi kóshi-qon kemýiniń ornyn toltyra almaǵan tómen tabıǵı ósim saldarynan azaıǵan.
