1 qańtar kúni týǵan tanymal qazaqstandyq tulǵalar
ASTANA. QazAqparat - 1 qańtar - qazaqtyń birtýar qaıratkerleri, qaıtalanbas tulǵalary dúnıege kelgen erekshe kún. QazAqparat agenttigi jyldyń alǵashqy kúninde týǵan tanymal qazaqstandyqtardyń tizimin usynady.
1 qańtarda týǵan tulǵalardyń negizgi bóligi shyǵarmashylyq jáne óner adamdary bolǵanyn baıqaımyz. Máselen, osydan 114 jyl buryn qazaqtyń áıgili keskindemeshisi, grafık-sýretshi, qazaq beıneleý óneriniń negizin salýshylardyń biri Ábilhan Qasteev (1904-1973) dúnıege kelgen. Sondaı-aq, 1 qańtar - ataqty keskindemeshi, ulttyq kásibı beıneleý óneriniń negizin salýshylardyń biri, Qazaqstannyń halyq sýretshisi Áýbákir Ysmaıylovtyń (1913-1998) týǵan kúni.
Bul kúni dúıim qazaqqa belgili mýzykanttar men kompozıtorlar da kóptep týǵan. 1909 jyly kórnekti ánshi, kompozıtor, Qazaqstannyń Halyq ártisi, Qazaqstannyń Memlekettik syılyǵynyń laýreaty Ǵarıfolla Qurmanǵalıev (1909-1993) pen qobyzshy-kompozıtor, Súgirdiń shákirti Jappas Qalambaev, 1904 jyly - qobyzshy Dáýlet Myqtybaev (1904-1970), 1921 jyy - kompozıtor, Qazaq KSR-iniń eńbek sińirgen óner qaıratkeri, KSRO Kompozıtorlar odaǵynyń múshesi Qapan Mýsın (1921-1970) dúnıege keldi. Sonymen birge, 1 qańtarda qazaqtyń aıaýly ánshisi, halyq jáne KSRO ártisi Roza Baǵlanova (1922-2011) men estradalyq ánshi, MýzArt tobynyń múshesi Sáken Maıǵazıev (1975) dúnıege kelgen.
Qazaqtyń mańdaıaldy qos aktrısasy da jańa jyldyń birinshi kúninde dúnıe esigin ashqan. 1914 jyly aktrısa, Qazaqstan jáne KSRO halyq ártisi, Qazaq KSR Memlekettik syılyǵynyń laýraty Sábıra Maıqanova (1914-1995), al 1923 jyly aktrısa, Qazaqstannyń halyq ártisi, Qazaqstan Respýblıkasy Memlekettik syılyǵynyń laýreaty Bıken Rımova (1923-2000) týǵan. Tiri bolǵanda ol 95 jasqa tolar edi.
Memlekettik bılik ókilderi arasynda da 1 qańtar kúni týǵandar az emes. Búgin QR Din isteri jáne azamattyq qoǵam mınıstri Nurlan Ermekbaev (1963), Astana qalasy ákiminiń orynbasary Asqar Ámrın (1975), Aqtóbe qalasynyń ákimi Іlııas Ispanov (1976), QR Birikken Arab Ámirlikterindegi Tótenshe jáne Ókiletti elshisi Qaırat Lama Sharıf (1962) jáne qazaqstandyq belgili bıznesmen, qoǵam qaıratkeri, iri metsenat Nuraly Álıev (1985) týǵan kúnderin toılamaq.
