+1 Ilon Mask: aýyl balasyn gadjetpen qamtý jobasy júzege asyp jatyr

NUR-SULTAN. QazAqparat – Kaz dream holdıngi «+1 Ilon Mask» jobasyn qolǵa aldy, ol ár aýyl balasyn gadjetpen qamtamasyz etýge, osylaısha olardyń bilim alýlaryna jaǵdaı jasaýǵa baǵyttalǵan. Bul týraly tsıfrlyq damý, ınnovatsııalar jáne aeroǵarysh ónerkásibi mınıstri Baǵdat Mýsın óziniń Instagram paraqshasynda málimdedi, dep habarlaıdy QazAqparat.

«IT naryqtaǵy tyń jobalarmen tanysý jáne salany damytý boıynsha usynystardy talqylaý maqsatynda qazaqstandyq IT kompanııalardy aralaýdy bastadym. Birinshi kezekte, 16 IT kompanııaǵa jetekshilik etetin elordadaǵy Kaz dream holdıngine bardym.

Kaz dream birneshe baǵytta jumys isteıdi, sonyń ishinde B2B, aqparattyq qaýipsizdik, quqyq qorǵaý organdary úshin jáne basqa da baǵytta IT ónimder ázirleıdi. Aıtpaqshy, olar birtindep halyqaralyq deńgeıge shyǵa bastady – sheteldik kompanııalardyń ókilderi Kazdream ónimderine qyzyǵýshylyq tanytyp otyr», - dep jazady mınıstr.

Vedomstvo basshysy holdıngtiń áleýmettik jobalarǵa kóp kóńil bólip otyrǵanyna nazar aýdarady.

«Kezdesý barysynda olar maǵan júzege asyryp jatqan «+1 Ilon Mask» jobasy týraly da aıtyp berdi. Bul joba ár aýyl balasyn gadjetpen qamtamasyz etýge, osylaısha olardyń bilim alýlaryna jaǵdaı jasaýǵa baǵyttalǵan. Olar jyl saıyn kompanııada esepten shyǵarylatyn noýtbýkterdi óz qarajattaryna jóndep, muqtaj balalarǵa úlestiredi eken. Bul jobaǵa tehnıkany berý arqyly ǵana emes, ony jóndeý boıynsha erikti retinde de qatysýǵa bolady. Meniń oıymsha, osyndaı jas ári jaýapty kompanııalar Qazaqstannyń IT ındýstrııasynyń bolashaǵyn qalyptastyrady jáne memlekettik organ retinde biz olardy qoldap, damýy úshin jaǵdaı jasaýymyz kerek», - dep jazdy Baǵdat Mýsın.