1 gramm gashısh úshin búkil jolaýshy medıtsınalyq tekserýden ótti
ASTANA. QazAqparat - QR UQK Shekara qyzmeti «Ońtústik» óńirlik basqarmasyna qarasty «Sypataı batyr avto» kóliktik shekara baqylaý beketiniń (qazaq-qyrǵyz shekarasy) shekara narıady búgin túnde saǵat 00.30-da Qyrǵyz Respýblıkasynan bizdiń elimizge qaraı kele jatqan, salonynda 17 jolaýshysy (2 adam reseılik, 15 adam qyrǵyzstandyq) bar «Mersedes-bents» shaǵyn avtobýsyna shekaralyq tekserý júrgizip, onyń barysynda qyzmettik ıt artqy qatardaǵy oryndyqtar arasynan muqııat oralǵan qońyr-jasyl tústi zat taýyp aldy. Aldyn ala ótkizilgen saraptama barysynda onyń gashısh esirtkisi ekendigi anyqtaldy.
Kóp emes, salmaǵy 1 gramm ǵana bolsa da bul úshin qylmystyq is qozǵalatyndyǵy belgili. Ádette, mundaı kólemdegi esirtkini esirtki tasymaldaýshylar emes, nashaqorlar ǵana alyp júredi. Júrgizýshi de, jolaýshylar da «gashıshti» birinshi ret kórip turǵandyqtaryn aıtýda. Amal joq, barlyǵyn saraptamaǵa aparýǵa týra keldi. Qazir barlyǵy Taraz qalasynda saraptamadan ótýde. Gashıshtiń kimdiki ekendigi taıaý ýaqytta belgili bolatyndyǵy sózsiz, - dep habarlaıdy QR UQK ShQ baspasóz qyzmeti.
