1 gektar sýarmaly jerdi qalpyna keltirýge jarty mıllıon teńge qajet

ASTANA. QazAqparat - Sýarmaly jáne lıandy sýarmaly jerlerdi qalpyna keltirýge 295 mlrd. teńge qajet. Bul týraly búgin Ortalyq kommýnıkatsııalar qyzmetindegi brıfıngte QR Aýyl sharýashylyǵy mınıstrligi Sý resýrstary komıtetiniń tóraǵasy Islam Ábishev málim etti, dep habarlaıdy QazAqparat.

«610 myń gektardyń árbir metr, árbir shaqyrymyn, aryqtaryn, ondaǵy sý qurylǵylarynyń barlyǵyn túgendeýden ótkizip, jobalyq qarjysyn eseptep shyǵardyq. 277 mlrd. teńge qajet. Bul esep 2016 jylǵy 1 qańtardaǵy baǵamen alynǵan. Munan bólek, lımandy jerlerdi qalpyna keltirýge 17 mlrd. qajet. Sonda barlyǵy 295 mlrd. teńge qajet dep otyrmyz. 1 gektar jerdi qaıta qalpyna keltirýge 455 myń teńge qajet bolady. Al lımandy sýarmaly jerlerdi qalpyna keltirýge 1 gektaryna 48 myń teńge qarjy jumsalady», - dedi Ábishev. 

Komıtet basshysynyń aıtýynsha, qajetti aqsha Islam damý banki, Azııa damý banki, Eýropalyq qaıta qurý jáne damý banki sııaqty halyqaralyq qarjy ınstıtýttarynan tartylady.

«Alǵan aqshany qaıtaryp berý qajet. Ony dıqandarǵa jetkiziletin sýǵa tólem alý arqyly qaıtaramyz dep josparlaýdamyz», - dedi ol.

Aıta keteıik, QR-dyń agroónerkásiptik keshenin damytýdyń 2017-2021 jyldarǵa arnalǵan memlekettik baǵdarlamasy boıynsha 610 myń ga aýmaqtaǵy turaqty sýarylatyn jerdiń ırrıgatsııalyq júıesin qalpyna keltirý josparlanǵan. Onyń ishinde Almaty oblysynda - 127  myń ga, OQO  - 99 myń ga, ShQO - 92 myń ga, Jambyl oblysy - 86 myń ga, BQO - 40 myń ga, Pavlodar oblysy - 30 myń ga, Aqtóbe oblysy - 29 myń ga, Qyzylorda oblysy - 29 myń ga, Qaraǵandy oblysy - 28 myń ga, SQO - 28 myń ga, Atyraý oblysy - 22 myń ga sýarmaly jer qalpyna keltiriledi.