1 energoblok, 4 qazandyq, 1 týrbına: Qazaqstandaǵy JEO-larda josparly jóndeý bastaldy
ASTANA. KAZINFORM — Energetıka mınıstrliginiń Memlekettik energetıkalyq qadaǵalaý jáne baqylaý komıtetinde aǵymdaǵy jylytý maýsymynyń ótýi jáne 2026 jylǵy jóndeý naýqanynyń josparlary boıynsha respýblıkalyq selektorlyq keńes ótti, dep habarlaıdy vedomstvonyń baspasóz qyzmeti.
Іs-sharaǵa «KEGOC» «QazaqGaz Aimaq», «QTJ» UK» AQ, «Samuryq-Energo», «OAEK» aktsıonerlik qoǵamdarynyń, «Qazaqstandyq kommýnaldyq júıeler», «Eýrazııalyq top» JShS basshylyǵy, sondaı-aq jergilikti atqarýshy organdardyń, aýmaqtyq departamentterdiń jáne óńirlerdegi energııa kásiporyndarynyń basshylary qatysty.
Aǵymdaǵy jylytý maýsymy shtattyq rejımde ótip jatyr, tutynýshylardy jylýmen jabdyqtaý turaqty qamtamasyz etilip keledi. 2025 jyldyń qorytyndysy boıynsha elektr stantsııalaryndaǵy tehnologııalyq buzýshylyqtar sany 8%-ǵa tómendedi, temperatýralyq grafıktiń saqtalmaý faktileri barynsha azaıtyldy.
Komıtet tóraǵasy Erjan Ertaev aralyq qorytyndylardy taldaý qabyldanyp jatqan sharalardyń tıimdiligin jáne jylytý kezeńiniń oń dınamıkasyn kórsetetinin atap ótti. Sonymen qatar, jekelegen óńirlerde jedel sheshimdi talap etetin júıeli máselelerdiń saqtalyp otyrǵanyna nazar aýdaryldy.
— Energııa kózderinde, jylý jáne elektr jelilerinde jóndeý jumystaryn sapaly ári ýaqtyly júrgizýdi qamtamasyz etý, sondaı-aq óńirlik shtabtar aıasyndaǵy jumysty úılestirýdi kúsheıtý asa mańyzdy, — dep atap ótti ol.
Keńes barysynda Biryńǵaı energetıkalyq júıeniń jumys isteýi, gazben jabdyqtaý jaǵdaıy jáne kómir tasymaly jónindegi baıandamalar tyńdaldy. Júıelik operatordyń bekitilgen josparyna sáıkes, aǵymdaǵy jyly 9 energoblokty, 55 qazandyqty jáne 51 týrbınany kúrdeli jóndeý josparlanǵan.
Búgingi kúni jóndeý naýqany aıasynda bir energoblokta, tórt qazandyqta jáne bir týrbınada jumystar bastaldy: «EEK» AQ Aqsý elektr stantsııasynyń № 5 energoblogy, Aqtaý q. MAEK JEO-2-niń № 7, Petropavl JEO-nyń № 6, Jezqazǵan JEO-nyń № 11 jáne Atyraý JEO-nyń № 2 qazandyqtary, sondaı-aq Stepnogorsk JEO-nyń № 4 týrbınasy. Atyraý oblysyndaǵy TShO kásipornynyń № 6.6 týrbınasyna júrgizilgen jóndeý jumystary tolyq aıaqtaldy.
Jabdyqtardyń tozý deńgeıi joǵary jáne táýekelderi artqan óńirlerge erekshe nazar aýdaryldy. Basym mindetter retinde energetıkalyq ınfraqurylymdy jańǵyrtý, jóndeý naýqanynyń jetkilikti qarjylandyrylýyn qamtamasyz etý, jylý jelileriniń senimdiligin arttyrý belgilendi.
Sonymen qatar energııa kásiporyndarynyń sý tasqyny kezeńine daıyndyǵy qaraldy. Kóktemgi sý tasqyny jaǵdaıynda energııa obektilerin qorǵaý jáne turaqty energııamen jabdyqtaýdy qamtamasyz etý boıynsha aldyn alý sharalaryn iske asyrý máseleleri talqylandy.
Keńes qorytyndysy boıynsha energııa kásiporyndarynyń basshylary men jergilikti atqarýshy organdarǵa jylytý maýsymynyń turaqty ótýin qamtamasyz etý, 2026 jylǵy jóndeý naýqanyn ýaqtyly ári sapaly júrgizý, anyqtalǵan problemalardy joıý boıynsha keshendi sharalar qabyldaý jáne tehnologııalyq buzýshylyqtarǵa jedel áreket etýge baqylaýdy kúsheıtý tapsyryldy.
Osydan buryn habarlanǵandaı, Pavlodar JEO-1 jáne Aqsýdaǵy ROK-2 jylý stansasynda bıyl qysta aqaýlar tirkelgen. Ótken jylý berý kezeńimen salystyrǵanda munda tehnologııalyq zań buzýshylyqtar sany eki esege artqan.