Bir aptada elordada kólikti mas kúıde basqarǵan 25 júrgizýshi ustaldy
ASTANA. KAZINFORM – Bir apta ishinde elorda aýmaǵynda úsh myńnan astam ákimshilik quqyq buzýshylyq tirkeldi. Bul týraly Astana qalalyq Polıtsııa departamenti Jergilikti polıtsııa qyzmeti basqarmasynyń bastyǵy Erjan Ádilbekov aıtty.
- 2025 jylǵy 18-21 aqpanda Astana qalasynyń aýmaǵynda «Qaýipsiz jol» respýblıkalyq jedel aldyn alý is-sharasy ótkizildi. Іs-shara barysynda jol qozǵalysy erejeleriniń óreskel buzylýyn anyqtaýǵa erekshe nazar aýdaryldy, - dedi Erjan Ádilbekov Astana qalalyq kommýnıkatsııalar qyzmetinde ótken brıfıngte.
Basqarma basshysynyń dereginshe, is-shara nátıjesinde 3 336 ákimshilik quqyq buzýshylyq tirkeldi. Onyń ishinde:
- qoǵamdyq oryndarda adamdardyń mazasyn alǵan 58 taksı júrgizýshisi;
- QR aýmaǵynda bolý erejelerin buzǵan 113 sheteldik azamat;
- tirkeýden ótpegen kólik quralyn basqarǵan 47 júrgizýshi;
- jalǵan memlekettik tirkeý nómirimen kólik basqarǵan 1 júrgizýshi;
- kólik basqarý kezinde telefon nemese radıostantsııa paıdalanǵan 183 júrgizýshi;
- jolaýshylar men júkterdi tasymaldaý, qaýipsizdik beldigin paıdalaný erejelerin buzǵan 484 júrgizýshi;
- manevr jasaý erejelerin buzǵan 162 júrgizýshi;
- qarsy jolaqqa shyqqan 61 júrgizýshi;
- baǵdarshamnyń tyıym salynǵan belgisine ótken 129 júrgizýshi;
- jaıaý júrginshilerge jol bermegen 108 júrgizýshi;
- apattyq jaǵdaı týǵyzǵan 111 júrgizýshi;
- mas kúıinde kólik júrgizgen 25 júrgizýshi;
- júrgizý quqyǵy joq bolsa da kólik basqarǵan 55 adam;
- medıtsınalyq kýálandyrýdan bas tartqan. 2 júrgizýshi;
- belgilenbegen jerden joldy kesip ótken 591 jaıaý júrginshi.
- Jol jóndeý, temirjol ótkelderin jáne basqa da jol ınfraqurylymdaryn ustaý talaptaryn buzǵany úshin 23 uıym, aldyn ala reıstik jáne medıtsınalyq tekserýden ótpegen taksı kólikterin shyǵarǵany úshin 10 taksı kompanııasynyń jaýapty tulǵalary ákimshilik jaýapkershilikke tartyldy, - dedi ol.
Abaı oblysynda tórt kúnde mas kúıde kólik aıdaǵan 11 adam ustalǵanyn jazǵan bolatynbyz.