1 aqpannan bastap jeke medıtsınalyq kitapsha boıynsha jumysqa ruqsat berý quzyreti básekelestik ortaǵa beriledi
ASTANA. 17 qańtar. QazAqparat - Ákimshilik kedergilerdi tómendetý jáne ruqsat berý sharalaryn jeńildetý maqsatynda medıtsınalyq kitapshalar boıynsha jumysqa ruqsat berý jáne turǵyndardyń dekrettelgen tobyn atttestatsııadan ótkizý (sanıtarlyq mınımým) sharalary básekelestik ortaǵa beriledi.
Bul aqparatty elimizdiń Densaýlyq saqtaý mınıstrliginiń baspasóz qyzmeti taratty.
«Jeke medıtsınalyq kitapshalar boıynsha jumysqa ruqsat berý sharasyn ýaqytsha eńbekke jaramsyzdyq jáne kásibı jaramdylyqqa (medıtsınalyq tekserý) saraptama júrgizýge lıtsenzııasy bar densaýlyq saqtaý mamandary júrgizetin bolady. Al turǵyndardyń dekrettelgen tobyn atttestatsııadan ótkizý mindeti sanıtarlyq-gıgıenalyq oqytýǵa tıisti lıtsenzııasy bar uıymdardyń jaýapty mamandaryna júkteledi», - delingen baspasóz habarlamasynda.
Vedomstvonyń atap ótýinshe, osyǵan deıin medıtsınalyq kitapshalar boıynsha jumysqa ruqsat berý jáne turǵyndardyń dekrettelgen tobyn atttestatsııadan ótkizý sharasyn halyqtyń sanıtarlyq-epıdemıologııalyq salaýattylyǵy salasyndaǵy ókiletti organnyń aýmaqtyq bólimsheleri júzege asyryp kelgen.
Atalǵan ruqsat berý sharalaryn medıtsınalyq tekserý júrgizetin jáne halyqty sanıtarlyq-gıgıena salasynda oqytatyn uıymdarǵa ótkizý kórsetiletin qyzmetterdiń sapasy men shynaıylyǵy úshin jaýapkershilikti arttyratyn bolady.
Kórsetilgen qyzmetterge baqylaýdy memlekettik sanıtarlyq-epıdemıologııalyq qadaǵalaý organdary júrgizedi.
