1 aqpannan bastap «Turan TV» telearnasy otandyq efırge shyǵady
ASTANA. 10 qańtar. QazAqparat - 2014 jyldyń 1 aqpanynan bastap QR Indýstrııa jáne jańa tehnologııalar mınıstrliginiń Týrızm ındýstrııasy komıtetiniń qoldaýymen synaq tártibinde «Turan TV» jańa televızııalyq arnasy otandyq efırge shyǵatyn bolady.
«Bul elimizdiń tarıhy men mádenıetin, sportyn, demalystaryn, saıahatyn, ishki týrızmin dáripteýge arnalǵan qazaqstandyq tuńǵysh telearna bolyp tabylady. Habar taratýdyń alǵashqy kezeńinde elimizdiń barlyq aýmaqtarynda Alma TV, ID TV jáne Otaý TV qazaqstandyq kabeldik operatorlarynyń jelilerimen qosarlasa qyzmet kórsetý josparlanýda. Spýtnıktik telearnalary arqyly habardy taratý josparlanyp otyr. Ony 16:9 úlgisinde, HD 720r sapasymen, stereo-aýdıojolymen qazaq jáne orys tilderinde taratý kózdelip otyr», delingen taratylǵan málimette.
«Turan TV» telearnasynyń bas dırektory Roman Botabekovtyń sózine qaraǵanda, arnanyń kontenti saıahat, ańshylyq, balyq aýlaý, Qazaqstannyń týrıstik jáne mádenı kóztartarlyq jerlerin, eń dámdi taǵamdardy, keremet salttardy, túrli ult ókilderiniń merekeleri men tarıhy sııaqty taqyryptardy qamtıtyn bolǵandyqtan jurtshylyqtyń qyzyǵýshylyǵyn týdyratyn bolady. Tyń jańalyqtardy izdeý maqsatymen telearna avtorlary Qazaqstannyń túkpir-túkpirine sapar jasaıtyn bolady.
Telearna óziniń jeke óndiristik negizimen, dıstrıbýtsııa qyzmetterin jáne marketıngterimen, sondaı-aq baǵdarlamanyń jetkilikti kitaphanasymen qamtamasyz etilgen. Qazirgi tańda 50-den astam baǵdarlama túsirildi.
Barlyq habar taratýdyń 80 paıyzyn «Turan TV» telekompanııasynyń jeke óndirisiniń kontenti, al derekti jáne kórkem fılmder 20 paıyzyn quraıdy dep boljanyp otyr.
