1 aqpannan bastap sýbsıdııa alý úshin arnaıy portalda ótinim berýge bolady

ASTANA. QazAqparat - «Agrónerkásip keshenin sýbsıdııalaýdyń biryńǵaı memlekettik aqparattyq júıesi» fermerlerge sýbsıdııaǵa ótinim resimdeý úshin balama retinde ázirlendi. Ótinimdi biryńǵaı gosagro.kz veb-portalynda berýge bolady. Júıe tolyǵymen avtomattandyrylǵan jáne aqysyz qyzmet kórsetedi, dep habarlaıdy QazAqparat AShM baspasóz qyzmetine silteme jasap.

2022 jyldyń 31 jeltoqsanynda burynǵy Qoldau.kz portalynan ınvestıtsııalyq sýbsıdııalaý boıynsha tolyq tarıhı derekter alyndy.

Qazirgi ýaqytta aqparattyq bazany jańa júıege engizý jumysy júrip jatyr.

SBMAJ arqasynda fermerlerge sýbsıdııalar alýdyń oryndylyǵyn rastaý úshin qosymsha anyqtamalardy usyný qajettiliginen arylady, óıtkeni talap etiletin aqparat basqa memlekettik aqparattyq júıelermen, sonyń ishinde jer ýchaskeleri, aýyl sharýashylyǵy janýarlary, tehnıka jáne arnaıy kólik jónindegi derektermen, kooperatıv músheleri týraly málimettermen, sondaı-aq «alqaptar kartasymen» biriktirilgen.

Investıtsııalyq sýbsıdııalar bóliginde qurylysta memlekettik saraptama júrgizý týraly derekterdi alý úshin «E-JSQ» aqparattyq júıesimen ıntegratsııalaý jumystary bastaldy.

Sýbsıdııalaýdyń biryńǵaı aqparattyq júıesi bıýdjettiń bolýyna qaramastan ótinimge rettik nómir bere otyryp, «kútý paraǵy» qaǵıdaty boıynsha jumys isteıdi.

Bıýdjet «kútý paraǵynda» ótinimderdiń kezektiligi boıynsha ǵana bólinetin bolady, oǵan fermerdiń tarapynan qosymsha is-áreketter qajet emes.

Bul tásil qarajatty bólýdiń ashyqtyǵyn qamtamasyz etedi jáne sýbsıdııalardy tóleý kezinde adamı faktordy boldyrmaıdy.

«Kútý paraǵyna» kelip túsken ótinim maquldanǵan bolyp esepteledi jáne tek tıisti qarjylandyrýdy kútedi.

Qazirgi ýaqytta sýbsıdııalaý jónindegi qyzmetterdi ótinim berilgen sátten bastap, sýbsıdııa tólengenge deıingi aralyqta tehnıkalyq pysyqtaý aıaqtaldy.

Qoldanystaǵy sýbsıdııalaý qaǵıdasyna sáıkes, fermerlerden ótinim qabyldaýdy bastaý merzimi belgilengen.

Negizgi ótinimderdi qabyldaý 2023 jyldyń 1 aqpanynda bastalady.