1 600 tonnadan astam azyq-túlik: Astanada úsh oblystyń jármeńkesi ótip jatyr
ASTANA. KAZINFORM — Astanada úsh oblystyń taýar óndirýshileri 1 600 tonnadan astam azyq-túlik ónimin usynatyn aýyl sharýashylyǵy jármeńkesi ótip jatyr. Pavlodar, Soltústik Qazaqstan jáne Ulytaý oblystarynan kelgen sharýalar et, sút ónimderi, kókónis, balyq, bal jáne basqa da taýarlardy tikeleı tutynýshylarǵa saýdalap, qala turǵyndaryna azyq-túlikti bir jerden tańdap alýǵa múmkindik berip otyr. Bul týraly Astana ákimdiginiń resmı saıty habarlady.
Jármeńke Qazanat ıppodromynda (Qarqaraly kóshesi, 1) saǵat 09:00–den 18:00–ge deıin ótedi.
Jármeńkede et jáne et ónimderi, sút ónimderi, kókónis, jumyrtqa, balyq, bal, bakaleıa taýarlary jáne basqa da azyq-túlik túrleri saýdalanady.
Pavlodar oblysynyń óndirýshileri jármeńkege 110 tonna et jáne et ónimderin, 440 tonna kókónis, 17 tonna sút ónimin, 24 tonna bakaleıa taýarlaryn, 14 tonna balyq, 10 tonna bal jáne 100 myń dana taýyq jumyrtqasyn jetkizgen.
Soltústik Qazaqstan oblysynan 1 000 tonnadan astam ónim usynylady. Onyń ishinde 110 tonna et jáne et ónimderi, 400 tonnadan astam kókónis, 180 tonnadan astam sút ónimderi, 80 tonnadan astam bakaleıa taýary, 5 tonna balyq, 10 tonna bal jáne 240 myń dana taýyq jumyrtqasy bar.
Al Ulytaý oblysynyń sharýalary 60 tonna et jáne et ónimderi men 20 tonna sút ónimderin ákelgen.
— Biz úshin ónimdi tikeleı satyp alýshyǵa usynýdyń mańyzy zor. Jármeńkege kelgen adamdar taýardyń baǵasyn surap, sapasyn kórip, ózine qajetti mólsherde satyp ala alady. Munda birneshe óńirdiń óndirýshileri jınalǵandyqtan, turǵyndardyń tańdaý múmkindigi de keńeıedi. Ásirese, kúndelikti tutynatyn et, sút ónimderi men kókónisterge suranys joǵary. Osyndaı saýda alańdary arqyly ónimimizdi kóbirek adamǵa tanystyryp, turaqty tutynýshylarmen baılanys ornatýǵa bolady, — dedi Soltústik Qazaqstan oblysynan kelgen satýshy Aıdos Sársenbaev.
Qala turǵyndary úshin de jármeńkeniń basty artyqshylyǵy — azyq-túliktiń túr-túrin bir jerden tańdap, baǵasyn salystyrý múmkindigi. Astana turǵyny Áıgerim Qasymovanyń pikirinshe, mundaı jármeńkeler otbasylyq bıýdjetti josparlaýǵa kómektesedi.
— Azyq-túlik — ár otbasynyń kúndelikti shyǵyny. Sondyqtan sapaly ónimdi qolaıly baǵamen satyp alý biz úshin mańyzdy. Jármeńkede ár óńirden kelgen óndirýshilerdiń taýarlary usynylǵandyqtan, birden birneshe ónim túrin tańdap alýǵa bolady. Sonymen qatar, taýardyń qaıdan jetkizilgenin bilip, óndirýshiniń ózinen surap alýǵa múmkindik bar. Osyndaı jármeńkeler turaqty uıymdastyrylyp tursa, qala turǵyndary úshin de, ónimin satýǵa kelgen sharýalar úshin de tıimdi bolar edi, — dedi ol.
Jármeńke 18 qazanǵa deıin jalǵasady. Qala turǵyndary men qonaqtary azyq-túlik ónimderin eki kún boıy saǵat 09:00–den 18:00–ge deıin satyp ala alady.
