1,5 trln teńge kerek – Birtanov medıtsınalyq nysandardyń tozýy jaıly

NUR-SULTAN. QazAqparat – Densaýlyq saqtaý mınıstri Eljan Birtanov medıtsınalyq nysandardyń eskirip, medıtsınalyq qurylǵylardyń tozýyna qatysty pikir bildirdi, dep habarlaıdy QazAqparat tilshisi.

«Shynynda da eskirý jaǵdaıy burynnan bar. Bizdiń esebimizshe bul ınfraqurylymdy qalpyna keltirý úshin zamanǵa saı tehnologııalardy eskermegenniń ózinde 1,5 trıllıon teńge kerek. ıAǵnı 100 paıyzdyq jaraqtandyrý úshin orasan zor qarajat qajet. Bul jerde álbette eń aldymen aýyldy aımaqtar men aýdandyq aýrýhanalarǵa qıyn. Sebebi ol jaqta mamandar beıimdelgen nysandarda jumys isteýge májbúr», - dedi Eljan Birtanov Densaýlyq saqtaý mınıstrliginiń Facebook paraqshasynda «Habar 24» arnasy tilshisiniń suraǵyna jaýap bere otyryp.

Mınıstrdiń aıtýynsha memleket 2007-2015 jyldary júrgizgen «100 mektep – 100 aýrýhana» baǵdarlamasy aıasynda ınfraqurylym edáýir jaqsaryp qalǵan. Alaıda bul rette ary ketse aýdandyq, oblystyq aýrýhanalar ǵana salynǵan.

«Ókinishke qaraı kóp bólik nazardan tys qaldy. Al qazir bul jumysty ary qaraı jalǵastyrýdyń mańyzy zor. Eń birinshi kezekte ortalyq aýdandyq aýrýhanalardy bekemdep, ekinshi kezekte oblystyq qalalardaǵy kópbeıindi aýrýhanalarǵa nazar aýdarǵan jón. Ondaǵy kópbeıindi medıtsınalyq ortalyqtarǵa ártúrli salanyń mamandaryn ıntegratsııalaı alar edik. Bizde qazir ókinishke qaraı aýrý tobynyń ár túrine arnalǵan aýrýhana bar. Adam aýyr jaǵdaıda emhanaǵa túsken kezde ony emdeı alatyn basqa aýrýhanaǵa aparýǵa týra keledi. Munyń arty adamdar úshin aıqyn qaýipke ákelýi yqtımal», - dedi Eljan Birtanov.

Mınıstr koronavırýs ınfektsııasymen betpe-bet kelgen kezde de qıyndyqtar týyndaǵanyn aıtady.

«Epıdemııa kezinde ınfektsııalyq emhanalardyń bary úlken artyqshylyq boldy. Alaıda kúrdeli patologııasy bar, pnevmonııamen adamdar túse bastaǵan kezde ártúrli mamandyqtaǵy dárigerlerdi tartýǵa týra keldi. Bizdegi ınfektsııalyq aýrýhanalarda kompıýterlik tomograftar da bolmaı qaldy. Al bul tomograftar dıagnostıka jasaýda eń kerekti maman. Sol sebepti ár óńirde kópbeıindi aýrýhana salýdyń mańyzy zor. Belgili bir aýrýmen túsken adamdy basqa aýrýhanalarǵa tasymaı, dál sol jerdegi mamandar qaraıtyndaı jaǵdaı jasalýy tıis. Bul – álemdik tájirıbe», - dep túıdi Eljan Birtanov.

Mınıstr osy sebepti memlekettik baǵdarlama aıasynda iri 20 kópbeıindi aýrýhana salý týraly jumys jospary engizilgenin málim etti.