1,5 mlrd. teńgeni jymqyrǵan QR AShM-nyń laýazymdy tulǵalaryna qatysty qylmystyq is qozǵaldy - Qarjy polıtsııasy
ASTANA. 4 maýsym. QazAqparat - Astana qalasy boıynsha qarjy polıtsııasy departamentiniń qyzmetkerleri
Aýyl sharýashylyǵy mınıstrligi Sý resýrstary komıtetiniń laýazymdy tulǵalarymen jasalǵan «Aýyz sý» memlekettik salalyq baǵdarlamasy sheńberinde bólingen 1,5 mlrd. teńge bıýdjet qarajatyn urlaý faktisin anyqtady. Bul týraly Ekonomıkalyq qylmysqa jáne sybaılas jemqorlyqqa qarsy kúres agenttiginiń baspasóz qyzmetinen málim etti.
2012 jyldyń 31 mamyrynda Qazaqstan Respýblıkasy Prezıdentiniń Jarlyǵymen erekshe strategııalyq mańyzy bar dep tanylǵan respýblıkanyń 7 oblysynda (ShQO, BQO, Qaraǵandy, Aqtóbe, Jambyl, Qostanaı jáne Almaty oblystary) ornalasqan 36 sýsharýashylyq júıelerin tekserý úshin «Aýyz sý» memlekettik baǵdarlamasy boıynsha bólingen 1,5 mlrd.teńgeni urlaý faktisi boıynsha Aýyl sharýashylyǵy mınıstrligi Sý resýrstary komıtetiniń laýazymdy tulǵalary men ózge de tulǵalarǵa qatysty qylmystyq is qozǵaldy.
Mundaı kópfaktorly tekserýlerden jyl saıyn beriktiligi, turaqtylyǵy men paıdalaný jaramdylyǵyna qaramastan, 25 jyldan astam ýaqyt paıdalanylyp kele jatqan júıeler men qurylǵylar ótýi tıis.
Anyqtalǵandaı, Sý resýrstary komıtetiniń laýazymdy tulǵalary nysandardy tekserý qyzmetin satyp alý boıynsha konkýrsty «Memlekettik satyp alýlar týraly» Qazaqstan Respýblıkasynyń zańyn óreskel buza otyryp ótkizgen.
Barlyq 36 nysan boıynsha atqarylǵan jumystardyń jalǵan aktileri jasalyp, olarǵa qol qoıylǵan. Bul aktilerdiń nátıjesinde «AKKE Astana» JShS-ne 1,5 mlrd.teńge bıýdjet qarajaty aýdarylǵan. Kásiporyn basshysy aqshalaı qarajatty ıemdenip, óz qajettilikterine jumsaǵan.
Bıýdjet qarajatyn urlaýdyń osy faktisine qatysy bar Sý resýrstary komıtetiniń laýazymdy tulǵalarynyń sheńberi anyqtalýda.
Atalǵan faktiniń memleketke iri kólemde zalal keltirgen júıeli sıpattaǵy sybaılas jemqorlyq qylmys bolǵandyqtan jáne aýqymy boıynsha eldiń jartysyn derlik qamtyǵandyqtan, ony tergeý Agenttik basshylyǵynyń erekshe baqylaýynda.
Qylmystyq is tergelýde, ózge aqparat tergeý múddesine baılanysty jarııalanbaıdy.
