1,5 mln qazaqstandyqtyń nesıe tarıhy buzylǵandyǵy týraly aqparat saqtalǵan
NUR-SULTAN. QazAqparat – Nesıesin japqan 1,5 mln qazaqstandyqta nesıe tarıhy buzylǵandyǵy týraly aqparat saqtalǵan. Bul týraly Senattyń jalpy otyrysynda QR Qarjy naryǵyn retteý jáne damytý agenttigi tóraǵasynyń orynbasary Nurlan Abdrahmanov aıtty, dep habarlaıdy QazAqparat tilshisi.
«Agenttik ekonomıkalyq taldaý júrgizgen bolatyn. Qazirgi ýaqytta elde eki kredıttik bıýro bar. Olarda 6,7 mln-ǵa jýyq qaryz alýshy boıynsha aqparat jınaqtalǵan, ıaǵnı osy málimetterde qazirgi nesıeler men ótelgen qaryzdar, sondaı-aq tóleý merzimi ótip ketken nesıeler qamtylyp otyr. Osynyń arasynda 1,5 mln adam nesıesin japqanymen, biraq olar boıynsha nashar nesıe tarıhy saqtalyp otyr. Óıtkeni bul adamdar tóleý merzimin 90 kúnnen asyryp alyp alǵan. Buǵan baılanysty bankter men mkroqarjylyq uıymdar olarǵa jańa qaryzdy berýden bas tartady. Atalǵan 1,5 mln adamnyń arasynda bes jyldan astam ýaqyt buryn tóleý merzimi ótip ketken qaryzdaryn 489 myń adam japty», - dedi N. Abdrahmanov.
Onyń aıtýynsha, nesıe tarıhyn saqtaý merzimi 10 jyldan 5 jylǵa deıin qysqarǵanda tıisti nátıje bolady.
Budan buryn habarlanǵandaı, Parlament Senatynyń jalpy otyrysynda «Qazaqstan Respýblıkasynyń keıbir zańnamalyq aktilerine Qazaqstan Respýblıkasynda banktik, mıkroqarjylyq jáne kollektorlyq qyzmetti retteý máseleleri boıynsha ózgerister men tolyqtyrýlar engizý týraly» Zańy eki oqylymda qaralyp, qabyldandy.
Osy orada problemalyq nesıeler boıynsha aqparatty saqtaý merzimi qysqartylmaq.
