1 424 aýyl mobıldi ınternetke qol jetkize almaı otyr - mınıstr
ASTANA. KAZINFORM — Elimizde 1 424 aýyl mobıldi ınternetke qol jetkize almaı otyr. Bul týraly Úkimet otyrysynda Tsıfrlyq damý, ınnovatsııalar jáne aeroǵarysh ónerkásibi mınıstri Jaslan Mádıev aıtty.
«Búgingi tańda ınternet bizdiń kúndelikti ómirimizde mańyzdy ról atqarady. Memlekettik onlaın qyzmetterge, bilimge, medıtsınaǵa jáne ekonomıka salalaryn tsıfrlandyrýǵa qol jetkizýdi qamtamasyz etedi. Halyqaralyq derekter boıynsha Qazaqstanda ınternetti paıdalanatyn halyqtyń úlesi damyǵan elder deńgeıinde. Búgingi kúni búkil álemde ınternetti tutynýdyń qarqyndy ósýi baıqalady. Qazaqstanda 2020-shy jylǵa qaraǵanda trafıktiń ósýi 61,5 paıyzǵa, al abonentter sany 12,9 paıyzǵa ósti», — dedi mınıstr.
Onyń atap ótýinshe, Speedtest Ookla-nyń 2024 jylǵy sáýirdegi derekterine sáıkes, Qazaqstan 43,62 Mbıt/s ortasha ınternet jyldamdyǵymen 66-orynda tur.
«Qazaqstanda 6 290 aýyl bar, onyń ishinde symdy ınternet boıynsha optıka 2 606 aýylǵa jetkizilgen. Mobıldi ınternet 4 866 aýylda qoljetimdi. Qoldanystaǵy salyqtyq jeńildikter aıasynda 2023 jyly 1 161 aýyl 4G tehnologııasyna qosyldy. Búgingi tańda 1 424 aýyl mobıldi ınternetke qol jetkize almaı otyr. Uıaly baılanys operatorlaryn yntalandyrý úshin mınıstrlik jańa Salyq kodeksine radıojıilik spektrine salyqtyq jeńildikterdi uzartýdy jáne tólem mólsherlemesin ózgertýdi usyndy. Osylaısha baılanys operatorlarynyń lıtsenzııalyq mindettemelerinde 1 076 aýyldy ınternetpen qamtamasyz etý kózdelgen», — deıdi Jaslan Mádıev.
