1,3 trln teńgeniń aktıvi qaıtadan ekonomıkalyq aınalymǵa enedi
«Eldiń búkil qarjy júıesiniń turaqtylyǵyn qamtamasyz etý maqsatynda strestik aktıvterdiń deńgeıin tómendetý jónindegi zańnamalyq baza qalyptasty. Osynyń arqasynda, barlyq buǵattalǵan aktıvtiń 54 paıyzy ekonomıkamyzǵa jumys isteıtin bolady. 1,3 trln teńgeniń aktıvi qaıtadan ekonomıkalyq aınalymǵa enedi. Saqtandyrý naryǵy, baǵaly qaǵazdar naryǵy, bank qyzmeti máseleleri jónindegi zań halyq úshin jańa saqtandyrý ónimderiniń paıda bolýyn, avtomobıldi saqtandyrý jaǵdaılaryn retteý tártibin jeńildetýdi qarastyrady», - dedi E. Qoshanov jetinshi saılanǵan Parlamenttiń ekinshi sessııasynyń jumysyn qorytyndylaý kezinde.
Sonymen qatar ol saıası júıeni jańǵyrtý aıasynda azamattyq qoǵamdy, qaıyrymdylyqty jáne volonterlik qyzmetti damytý máseleleriniń ózektiligi arta túskenin aıtty.
«Bul úshin zańnamalyq turǵyda strategııalyq áriptestiktiń jańa tetigi engizildi. Kommertsııalyq emes uıymdardy granttyq qarjylandyrý rásimderi jeńildetildi. Azamattardy volonterlik qyzmetke jáne qaıyrymdylyqqa qatysýǵa yntalandyrý sharalary qarastyryldy», - dedi Májilis tóraǵasy.
Budan buryn habarlanǵandaı, Parlament depýtattary kanıkýlǵa ketti. E. Qoshanov ekinshi sessııanyń zańnamalyq kún tártibi aıtarlyqtaı mazmundy bolǵanyn aıtty.
«Máselen, Pralament palatalarynyń 4-shi birlesken otyrysy ótti. Májilistiń 42 jalpy otyrysy ótip, onda 271 másele qaraldy. Senattyń 42 jalpy otyrysy ótip, onda 148 másele qaraldy. Osy sessııa kezinde qos palatanyń jumysynda 127 zań jobasy boldy, onyń 78-i qabyldandy», - dedi Májilis tóraǵasy.