1,3 myńnan astam brıtandyq polıtseı tergelip jatyr

LONDON. QazAqparat – Anglııa men Ýelste 1,3 myńnan astam polıtsııa qyzmetkeri qylmys jasady degen kúdikke ilindi. Sońǵy 10 jylda tergeýge alynǵan brıtandyq quqyq qorǵaýshylar sany 590% ósken, dep habarlaıdy QazAqparattyń menshikti tilshisi.

Observer gazeti júrgizgen tekserý kórsetkendeı, 2022 jyly Anglııa men Ýelstegi 140 myń qazirgi jáne burynǵy tártip saqshylary múshe bolǵan polıtsııa qyzmetkerleri qaýymdastyǵy qylmys jasady degen aıyp taǵylǵan qaýipsizdik qyzmetkerlerinen 1387 quqyqtyq qoldaý týraly málimdeme alǵanyn anyqtady.

Sondaı-aq, gazet derekteri 2012 jyldan bastap polıtseılerge qatysty tergeý sany 590%-ǵa óskenin kórsetip otyr.

10 jyl buryn polıtsııa qyzmetkerleri qaýymdastyǵynan tek 235 quqyq qorǵaý qyzmetkeri zańdy qoldaý suraǵan.

Jańa derekter brıtan qaýipsizdik kúshterine qatysty janjaldyń kóbeıýi aıasynda ashyldy.

Qańtar aıynda tek elordalyq polıtsııada 800-ge jýyq ofıtserge qatysty seksýaldyq jáne turmystyq zorlyq-zombylyq týraly 1 myń ótinish tekseriletini belgili boldy.

Bul rette London polıtsııa basqarmasynyń 150 qyzmetkeri seksýaldy sıpattaǵy áreketi nemese násilshildigi úshin tergeýge alynǵan.

Osy aıdyń basynda Londonnyń burynǵy polıtsııa qyzmetkeri Devıd Kerrık kem degende 12 áıeldi zorlaǵany úshin ómir boıyna bas bostandyǵynan aıyrylǵan bolatyn.