1-3 qańtar aralyǵynda Qazaqstannyń birqatar aımaqtarynda kún raıy buzylady - Qazgıdromet
ASTANA. QazAqparat - «Qazgıdromet» RMK habarlaýynsha, 1-3 qańtar aralyǵynda elimizdiń 7 aımaǵynda aýa raıy buzylady.
Atap aıtqanda, Astana qalasynda 1 qańtarda boran soǵyp, ońtústik-batystan soqqan jeldiń ekpini 15-20 m/s deıin jetedi. Sondaı-aq 1 qańtarda Aqmola, Pavlodar oblystarynyń keı jerlerinde boran soǵady. Ońtústik-batystan soqqan jel 17-22 m/s, keı jerlerde onyń ekpini 27 m/s deıin jetedi. 2-3 qańtarda Aqmola, Soltústik Qazaqstan oblystarynda, 3 qańtarda Pavlodar oblysynda túnde aýa temperatýrasy 20-25 gradýsqa deıin tómendeıdi, keı jerlerde 27-32 gradýs aıaz bolady. 2 qańtarda Ońtústik Qazaqstan, Almaty, Jambyl oblystarynda qatty jańbyr jaýyp, arty qarǵa ulasady, tuman túsip, kóktaıǵaq bolady. Ońtústik-batystan soqqan jeldiń kúshi keı jerlerde 17-22 m/s deıin jetedi. 3 qańtarda aýa temperatýrasy túnde 5-10 gradýsqa deıin tómendep, keı aımaqtarda 15 gradýs aıaz bolady. 2 qańtarda Qyzylorda oblysynda túnde aýa temperatýrasy 7-12 gradýsqa deıin, keı jerlerde 15 gradýsqa deıin tómendeıdi.
