1 200-den astam dárilik zat memlekettik baǵa retteý júıesinen shyǵarylady

Vedomstvo málimetinshe, bul shara básekelestikti damytýǵa, dárilik zattardyń ataýyn keńeıtýge jáne olardyń halyq úshin qoljetimdiligin arttyrýǵa baǵyttalǵan. Nátıjesinde 1 200-den astam dárilik zattyń baǵasy naryqtyq tetikterdiń negizinde qalyptastyrylady. Baǵasy tómen dárilik zattardy memlekettik baǵa retteýinen shyǵarý naryq qatysýshylaryna suranys pen usynysty eskere otyryp, baǵany óz betinshe qalyptastyrýǵa múmkindik beredi.

— Baǵalardy kezeń-kezeńimen yryqtandyrý aıasynda Densaýlyq saqtaý mınıstriniń 2026 jylǵy 4 qyrkúıektegi № 105 buıryǵymen kóterme jáne bólshek saýdada ótkizý kezinde baǵasy rettelýge jatatyn dárilik zattar tizbesine ózgerister engizildi. Jańartylǵan tizbege sáıkes, memlekettik baǵa retteýine jatatyn pozıtsııalardyń sany 3 039-dan 1 827-ge deıin qysqartyldy. Osylaısha, memlekettik retteý neǵurlym nysanaly sıpatqa ıe bolyp, halyq úshin qoljetimdiligin qosymsha qorǵaýdy qajet etetin dárilik zattarǵa shoǵyrlandyrylady, — dedi mınıstrlikten.

Sonymen qatar Densaýlyq saqtaý mınıstrligi baǵalardy monıtorıngteý jáne baqylaý tetikterin, onyń ishinde taýarlardy tańbalaý jáne qadaǵalaý aqparattyq júıesin paıdalaný arqyly jetildirý máselesin pysyqtap jatyr. Tsıfrlyq quraldar dárilik zattardyń qozǵalysyn qadaǵalaýǵa jáne olardyń aınalymynyń ártúrli kezeńderindegi naqty baǵalardy taldaýǵa múmkindik beredi.

Dárilik zattardyń belgilengen shekti bólshek saýda baǵasynyń asyp ketken faktileri anyqtalǵan jaǵdaıda DariKZ mobıldik qosymshasy arqyly rastaıtyn materıaldardy (taýar chegi men dárilik zattyń qaptamasyn) qosa tirkep, Densaýlyq saqtaý mınıstrliginiń Medıtsınalyq jáne farmatsevtıkalyq baqylaý komıtetiniń aýmaqtyq departamentterine ótinish jiberýge bolady.

Buǵan deıin 36 mln teńgeniń tegin dárileri naýqastarǵa jetpeı, dárihanadan satylyp ketkenin jazǵan edik.