1,2 mlrd teńgeden astam somaǵa jalǵan shot-faktýralar jasaǵan astanalyq sottaldy
ASTANA. QazAqparat - Astana qalasy Saryarqa aýdanynyń №2 aýdandyq soty jalǵan shot-faktýralar jasaý faktisi boıynsha kúdiktige qatysty aıyptaý úkimin shyǵardy, dep habarlaıdy QazAqparat.
Kúdikti 2020 jáne 2022 jylǵy 1 toqsan aralyǵynda kontragent–kásiporyndar salyq túrinde tólemegen 1 mlrd 217 mln teńge somasynda memleketke asa iri zalal keltire otyryp, 10 kásiporynnyń atynan is júzinde jumysty oryndamaı, qyzmet kórsetpeı, taýarlardy jóneltpeı shot-faktýralar jasaýdy uıymdastyrǵan.
«Kúdikti kásiporyndardy satyp alyp, tirkegen jáne olar arqyly jalǵan shot-faktýralar jasaǵan. Sosyn osyndaı qyzmetterge muqtaj kontragentterdi izdep, olarmen mámile jasap, sodan keıin qolma-qol aqshaǵa aıyrbastap otyrǵan», - delingen baspasóz baıanynda.
Sottalýshy kinásin tolyq moıyndady. Budan basqa, onyń kinási kýálar bergen aıǵaqtar, qosylǵan qun salyǵynyń nátıjeleri, sot-ekonomıkalyq saraptama qorytyndysy, Memlekettik kiris departamenti mamandarynyń qorytyndylary jáne istiń basqa da materıaldary arqyly dáleldendi.
Qylmystyq kodekstiń 216-baby 3-bóliginde bul qylmysqa 7 jylǵa deıin bas bostandyǵynan aıyrý jazasy kózdeledi. Sot jazany jeńildetýge qatysty kúdiktiniń óz kinásin moıyndap, shyn ókinetindigine nazar aýdardy.
«Kúdikti áreketterinde qylmystardyń qaıtalanýy jaýapkershilikti aýyrlatatyn jaǵdaı boldy. Óıtkeni ol buryn aýyr qylmys jasaǵany úshin sottalǵan jáne qaıtadan aýyr qylmys jasap otyr. Osyǵan baılanysty sot kúdiktige kommertsııalyq uıymdarda basshy laýazymdardy atqarýǵa, onyń ishinde 6 jyl merzimge shot-faktýralardy ázirleýge baılanysty laýazymdardy atqarýǵa tyıym saldy. Sonymen qatar qaýipsizdigi eń joǵary qylmystyq-atqarý júıesi mekemesinde 4 jylǵa bas bostandyǵynan aıyrý týraly jaza kesti.Múlki tárkilengen joq, óıtkeni sotqa deıingi tergep-tekserý barysynda sottalǵan adamnyń qylmystyq jolmen alynǵan nemese qylmystyq jolmen tapqan qarajatyna satyp alǵan múlikter bolǵan joq», delingen baspasóz baıanynda. Úkim zańdy kúshine áli engen joq.
