1,2 mln teńgeni quraıtyn jalǵan banknottar anyqtaldy

NUR-SULTAN. QazAqparat – Qazaqstanda bıyl jalpy somasy 1,2 mln teńgeni quraıtyn 381 jalǵan banknot anyqtaldy. Bul týraly QazAqparat Ulttyq bankke silteme jasap habarlaıdy.

«Qazaqstanda 2020 jylǵy jeti aı aralyǵynda jalpy somasy 1,2 mln teńge quraıtyn 381 jalǵan banknotasy anyqtaldy. Sonymen qatar, atalǵan kezeńde jalǵan monetalardy shyǵarý faktileri tirkelmedi» - dedi Ulttyq banktiń qolma-qol aqsha aınalymy departamentiniń banknottardy jáne monetalardy saraptaý basqarmasynyń bastyǵy Ashat Ábishev

Bank ókili atap ótkendeı, jalǵan aqsha belgileriniń sany 2019 jyldyń uqsas kezeńimen salystyrǵanda 46,9 % - ǵa tómendedi (ótken jylǵy kórsetkish - 718 banknot jáne 6 moneta).
Jalǵan banknottardyń basym bóligi Almaty qalasynda anyqtaldy - 243 jalǵan banknoty (63,78%). Bul rette, kóbinese Qazaqstanda 2020 jyly nomınaly 2 myń (41,47 %) jáne 5 myń teńgelik (31,5%) banknotalar qoldan jasalǵan.
Aıta ketsek, Qazaqstanda jalǵan banknottary shyǵarý jáne satýmen aınalysqandar 5 jyldan 12 jylǵa deıingi merzimge sottalady.