1,2 mln adamǵa jumysqa ornalasýǵa kómek kórsetiledi – Eńbek mınıstri
Mınıstrdiń aıtýynsha, pandemııadan týyndaǵan qıyndyqtarǵa jáne ótken jyly qabyldanǵan qajetti shekteý sharalaryna qaramastan, eńbek naryǵynyń negizgi ındıkatorlary jaǵdaıdyń turaqtylyǵyn kórsetken. Buǵan halyqty jumyspen qamtýǵa baǵyttalǵan jedel sharalar yqpal etti.
«Birinshiden, «Eńbek» memlekettik baǵdarlamasy aıasynda 2020 jyly 650 myńǵa jýyq adam qamtyldy, olardyń 319 myńy turaqty jumys oryndaryna ornalastyryldy. 70 myńnan astam adam qysqa merzimdi kýrstarda oqydy jáne 33 myń adam «Bastaý Bıznes» jobasy boıynsha kásipkerlik negizderine oqytyldy», – dedi Serik Shápkenov.
Kásipkerlik bastamalardy qoldaý úshin 13 myńǵa jýyq jeńildikti mkrokredıt jáne jańa bıznes-ıdeıalardy iske asyrýǵa 45 myń qaıtarymsyz memlekettik grant berilgen. Mıkrokredıt alýshylar 13,7 myń qosymsha jumys ornyn ashqan.
«Sondaı-aq, ótken jyly «Jumyspen qamtýdyń jol kartasy» daǵdarysqa qarsy baǵdarlamasy aıasynda 239 myń adam jumysqa ornalasty, olardyń kópshiligi – halyqty jumyspen qamtý ortalyqtarynda tirkelgen jumys izdeýshiler men jumyssyzdar. Jol kartasy arqyly 6,7 myń áleýmettik mańyzy bar nysan iske qosyldy. Bıyl jol kartasyn iske asyrýǵa 300 mlrd teńge qarastyrylǵan. Bólingen qarajattyń 42,5%-y halyqtyń ómir súrý sapasyn arttyrýǵa baǵyttalady. Shamamen 33,3%-y – agroónerkásiptik keshendi damytýǵa jáne 24,2%-y óńirlerde bıznesti damytýǵa jáne «Atameken» UKP men jergilikti atqarýshy organdardyń qatysýymen mıkrokredıt berýge paıdalanylady. Shamamen 41 myń jumys orny ashylady, onyń 61 paıyzy turaqty jumys bolady», - deıdi S. Shápkenov.
Eńbek mınıstriniń aıtýynsha, jalpy 2021 jyly jumyspen qamtýǵa járdemdesý sharalarymen 1,2 mln adam qamtylady, onyń ishinde:
- «Eńbek» memlekettik baǵdarlamasy arqyly - 700 myńnan astam adam;
- Jumyspen qamtýdyń jol kartasy aıasynda – 41 myń jumys orny qurylady, onyń ishinde 28 myńy turaqty jumys orny bolady;
- basqa memlekettik baǵdarlamalar aıasynda 440 myń jańa jumys ornyn qurý josparlanýda.
