1-15 maýsym aralyǵynda elimizdiń sý qoımalarynda 57 adam, onyń ishinde 7 bala qaza tapty
ASTANA. 21 maýsym. QazAqparat - Bul týraly búgin brıfıng barysynda QR Tótenshe jaǵdaılar mınıstrliginiń resmı ókili Lıýbov Shaposhnıkova málim etti.
Jaǵalaý maýsymy ashylǵannan bastap sýdaǵy tótenshe jaǵdaılar qaýpi kúrt ósetindigin atap ótken ol: «Statıstıkalyq málimetter boıynsha aǵymdaǵy jyldyń 5 aıynda elimizdiń sý aıdyndarynda 464 adam, onyń ishinde 93 bala apatqa ushyrady. Olardyń 77-si, ishinde 17 bala bar sýǵa ketti. QR TJM sýda qutqarý qyzmetiniń mamandary 387 adamdy, onyń ishinde 76 balany qutqardy. Ótken jyldyń dál osy kezeńinde sýda 246 adam apatqa ushyrady, onyń ishinde 153 adam qutqarylyp, 93 adam qaza tapqan edi», - dedi.
Sonymen qatar resmı ókildiń atap ótýinshe, aǵymdaǵy jyly sýǵa túsý maýsymy bastalǵannan bergi aralyqta, ıaǵnı 1-15 maýsym kúnderi respýblıkanyń sý aıdyndarynda 159 adam, onyń ishinde 49 bala apatqa ushyraǵan. 57 adam, onyń ishinde 7 bala sýǵa ketip, mert bolǵan. Al QR TJM sýda qutqarý qyzmetiniń mamandary 102 adamdy, onyń ishinde 38 balany aman alyp qalǵan.
«Atalǵan statıstıka bizdiń elimizdiń barlyq azamattarynyń nazaryn aýdarýy ári sýdaǵy qaýipsizdik sharalary týraly oılandyrýy tıis. Óıtkeni, kóbine sýǵa túsý úshin belgilenbegen oryndarda adamdar sýǵa ketip jatady», - dedi L.Shaposhnıkova.
