22:22, 06 Qarasha 2017 | GMT +5
1,134 mln teńgege baǵalanatyn eki elikti atqan ShQO turǵyny ustaldy
ASTANA. QazAqparat - Shyǵys Qazaqstan oblysynyń Kókpekti aýdanynda zańsyz elik atqan brakoner qolǵa tústi. Bul týraly QR AShM Orman sharýashylyǵy jáne janýarlar dúnıesi komıtetiniń baspasóz hatshysy Sáken Dildahmet Feısbýktegi paraqshasynda jazdy, dep habarlaıdy «QazAqparat» HAA tilshisi.
«2017 jyldyń 4 qarashasynda ShQO orman sharýashylyǵy jáne janýarlar álemi aýmaqtyq ınspektsııasynyń qyzmetkerleri Kókpekti aýdanynyń Marınovka aýylyna jaqyn mańda reıd júrgizgen. Onyń barysynda zańsyz ustap júrgen ańshy qarýymen 2 elik atyp alǵan azamatty qolǵa túsirdi. Memleketke keltirilgen shyǵyn 1 134 500 teńgeni quraıdy», - dep habarlady Sáken Dildahmet.
Qazirgi ýaqytta QR Qylmystyq kodeksiniń 337-baby 3-bóligi boıynsha qylmystyq is qozǵalyp, sotqa deıingi tergeý amaldary júrgizilip jatyr.
Vedomstvonyń baspasóz qyzmetiniń málimetine súıensek, qazirgi ýaqytta Qazaqstanda 88 364 elik bar. Zańsyz elik atqandarǵa QR QK 337-baby boıynsha qylmystyq jaýapkershilik qarastyrylǵan jáne olar 300 AEK-ke deıingi aıyppulmen jazalanady.