1 125 áskerı qyzmetshi tegin sanatorlyq-shıpajaılyq em-dommen qamtamasyz etiledi - QR QK (FOTO)
Maýsym-shilde aılarynda olardyń 385-i saýyqtyrý kýrsynan ótti. Qalǵandary tamyz jáne qyrkúıekte em qabyldaý demalysyna barýdy josparlap otyr, dep habarlaıdy QR Qorǵanys mınıstrliginiń baspasóz qyzmeti.
Tegin sanatorlyq-shıpajaılyq emdeý Qazaqstandaǵy áskerı qyzmetshiler úshin qarastyrylǵan kepildi medıtsınalyq qyzmetter paketine kiredi. Ony medıtsınalyq kórsetilimi bar áskerı qyzmetshiler, áskerı oqý oryndarynyń kýrsanttary, merzimdi qyzmettegi sarbazdar ala alady.
«Kóbinese aýrý-syrqaý, jaraqat nemese hırýrgııalyq operatsııadan keıin em qabyldaıdy. Densaýlyqtaryn tegin qalpyna keltirýge Qazaqstan Qarýly Kúshteriniń qoldanystaǵy zeınetkerleri de quqyly. Biz saýyqtyrý-ońaltý, posttravmatıkalyq nemese postoperatsııalyq qalpyna keltirýge muqtaj áskerı qyzmetshilerdiń esebin udaıy júrgizip otyramyz. Osy esepten sanatorııge joldanatyndardyń tizimin quraımyz, al jazǵy kezeń bastalysymen adamdar em-dom qabyldaýǵa joldanady», - dep túsindirdi QR QK Bas áskerı-medıtsınalyq basqarmasynda. Búgingi tańda áskerı qyzmetshilerdi úsh qazaqstandyq shıpajaı qabyldaıdy. Ol Qostanaıdaǵy «Sosnovyı bor», Şýchedegi «Zelenyı bor» jáne Qapshaǵaı sý qoımasynyń soltústik jaǵalaýyndaǵy «Altynemel». Barlyq úsh shıpajaı tabıǵaty kórkem jerlerde ornalasqan jáne saýyqtyrý em-sharalarynyń jaqsy jıyntyǵynyń arqasynda suranysqa ıe. Pantalyq, teńiz jáne qylqan japyraq bulaýlary, lazer terapııasy, balshyqpen emdeý, ıngalıatsııa, emdik ýqalaý, balaýyzben emdeý jáne taǵy basqa em-sharalar. Ótken úsh jyl ishinde munda 2 000-nan astam áskerı qyzmetshi sanatorlyq-shıpajaılyq em alǵanyn atap ótken jón.