1,1 mln jumysshynyń eńbekaqysy kóterildi - QR Kásipodaqtar federatsııasy

NUR-SULTAN. QazAqparat – QR Kásipodaqtar federatsııasy 2 mıllıonǵa jýyq kásipodaq múshelerin bir shańyraqtyń astyna biriktirip otyr. Bul týraly Kásipodaqtar kúnine oraı ótken saltanatty jıynda QR Kásipodaqtar federatsııasynyń tóraǵasy Eraly Toǵjanov málim etti, dep habarlaıdy QazAqparat tilshisi.

Qazaqstan Kásipodaqtary kúni alǵash ret resmı deńgeıde atalyp jatqanyna toqtalǵan ol, «búginde QR Kásipodaqtar federatsııasy 2 mıllıonǵa jýyq kásipodaq múshelerin bir shańyraqtyń astyna biriktirip otyrǵan Qazaqstandaǵy eń iri qoǵamdyq uıym. Osy oraıda kásipodaqtar qazaqstandyqtardyń ómir súrý sapasyn jaqsartýǵa baǵyttalǵan úrdisteriniń basy-qasynda bolýy tıis. Joldaýda halyqpen tikeleı baılanys ornatý, azamattarymyzdyń ótinishteri men aryzdaryna basa nazar aýdarý syndy máseler de aıryqsha kórsetilgen», - dedi.

Onyń aıtýynsha, búginde Kásipodaqtar federatsııasy áleýmettik-eńbek salasynda mańyzdy máselelerdiń sheshimine jan-jaqty qatysý úshin saraptamalyq ári uıymdastyrýshylyq áleýetke ıe. Federatsııa áleýmettik áriptestermen birlese otyryp, jumys oryndaryn saqtaý qyzmetin ózektendirdi. Belgili bolǵandaı, qazirgi tańda 126 myńnan astam memorandým bekitilip, elimiz boıynsha 2 mıllıon 292 myń jumysshy qamtyldy.

Eraly Toǵjanov jalaqysy tómen jumysshylardyń eńbekaqysyn kóterý máselesi jiti nazarda ekenin, búginde elimizde 199,6 myń jumys berýshi 1,1 mln jumysshynyń eńbekaqysyn ósirgenin jetkizdi.

Aıta keteıik, saltanatty jıyn barysynda kásipodaqtar qozǵalysynyń damýyna zor úles qosqany úshin kásipodaq múshelerin, kásipodaqtar qozǵalysynyń ardagerlerin, áleýmettik áriptesterdi marapattaý rásimi ótti.

Budan buryn habarlanǵandaı, Qazaqstan Kásipodaqtary kúni kásibı merekesine oraı saladaǵy qaıretkerlerge QR Prezıdenti Qasym-Jomart Toqaevtyń «Aǵys haty» tabystaldy.