1 010 eldi meken sý basý qaýpine neǵurlym beıim
NUR-SULTAN. QazAqparat - 1 010 eldi meken sý basý qaýpine neǵurlym beıim. Bul týraly QR TJM Tótenshe jaǵdaılardyń aldyn alý departamentiniń bastyǵy Rústembek Ámrın aıtty, dep habarlaıdy QazAqparat tilshisi.
«Sý tasqynynyń teris áserin tómendetý maqsatynda taldaý júrgizdik. Onyń nátıjeleri boıynsha kóktemgi sý tasqyny kezinde 800 myńnan astam adam turatyn 1 010 eldi meken sý basý qaýpine neǵurlym beıim dep aıqyndadyq», - dedi ol Ortalyq kommýnıkatsııalar qyzmetindegi baspasóz máslıhatynda.
Departament bastyǵynyń aıtýynsha, Tótenshe jaǵdaılar mınıstrligi respýblıkalyq deńgeıde múddeli mınıstrliktermen jáne ákimdiktermen birlesip, 2021-2023 jyldarǵa arnalǵan sý tasqynyna qarsy is-sharalardyń jol kartasyn ázirledi jáne iske asyrylýyn baqylaýda. Jol kartasy Tótenshe jaǵdaılar, Ekologııa, geologııa jáne tabıǵı resýrstar mınıstrlikteriniń, sondaı-aq Indýstrııa jáne ınfraqurylymdyq damý mınıstrliginiń birlesken buryǵymen bekitilgen.
«Ótken jyly sý tasqynyna qarsy is-sharalardyń jol kartasy aıasynda 37 is-sharany iske asyrý aıaqtaldy. Budan basqa, sý tasqynyna qarsy is-sharalar aýmaqtardy damytýdyń keshendi josparlary jáne oblystyq sý tasqynyna qarsy josparlar aıasynda iske asyrylýda», - dedi Rústembek Ámrın.
