086 úlgisindegi medıtsınalyq anyqtamalar arzandaýy múmkin
ASTANA. QazAqparat - QR Memlekettik qyzmet isteri jáne sybaılas jemqorlyqqa qarsy is-qımyl agenttigi eki mınıstrlikke usynym hat joldady. Onda medıtsınalyq anyqtamalardyń zańsyz saýdasyna júrgizilgen tekseristiń nátıjesi kórsetilgen, dep habarlaıdy QazAqparat tilshisi.
Agenttiktiń Astana qalasy boıynsha departament basshynyń orynbasary Jazıra Jylqyshıevanyń aıtýynsha, agenttik basshysy eki mekemege - QR Eńbek jáne halyqty áleýmettik qorǵaý mınıstrligine, sondaı-aq QR Densaýlyq saqtaý mınıstrligine usynym hat joldady. «Birinshiden, Densaýlyq mınıstrligine úlken aqparattyq bazany jasaý qajet. Onda medıtsınalyq tekseristen ótken barlyq adamdardyń tizimi bolýy shart. Jumys berýshiler adamdy qabyldaǵanda qaǵazdy suramaıdy, adamnyń medıtsınalyq tekseristen ótkenin, ıa ótpegenin sol aqparattyq bazadan kóre alady. Al Eńbek jáne halyqty áleýmettik qorǵaý mınıstriligi jumys berýshiniń jeke jaýapkershiligin engizýi kerek. Ol jumysqa qandaı adamdy qabyldap jatyr? Densaýlyǵy durys pa? Eger jumys berýshiniń jeke jaýapkershiligi bolsa, onda jumysqa turǵysy keletin adamdar da medıtsınalyq tekserister durys ótetin bolady», - dedi J.Jylqyshıeva QazAqparat tilshisine bergen suhbatynda.
Onyń sózine qaraǵanda, medıtsınalyq anyqtamalardyń baǵasyn tómendetýge qatysty usynys ta bar. Búginde emhanada 086 úlgisindegi medıtsınalyq anyqtamanyń baǵasy 5 myń teńge turady. Qosymsha narkolog pen psıhıatrǵa qaralsa, ondaı anyqtamanyń quny 6,5-7 myń teńgege shyǵyp ketedi. Al ǵalamtorda osy sanattaǵy zańsyz qujattardy 2,5-3 myńǵa satyp jatady.
«Biz densaýlyq saqtaý mınıstrligine medıtsınalyq anyqtamalardyń baǵasyna qatysty taǵy bir usynys jasadyq. Sebebi qarapaıym adamdar úshin 5-6 myń aqsha shyǵarǵan ońaı emes. Endi, naqty somany kórsetken joqpyz. Biraq baǵany tómendetýdi usyndyq. Áli bir aı ótken joq. Qazir jaýapty kútip otyrmyz», - dedi J.Jylqyshıeva.
Aıta keteıik, osydan bir aı buryn departament qyzmetkerleri uıymdasqan qylmystyq topty quryqtaǵan bolatyn. Olar joǵary sapaly kompıýterlik texnıkanyń kómegimen medıtsınalyq qujattardy basyp, halyq arasynda satyp kelgen. Tintý kezinde 086 úlgisindegi medıtsınalyq anyqtamanyń 200-den astam blankisi, 190-ǵa jýyq sanıtarlyq kitapsha, medıtsınalyq mekemeler men dárigerlerdiń 80-nen astam mórleri, medıtsınalyq analızderdiń nátıjeleri, flıýrografııalyq sýretter, medıtsınalyq dıagnozdar jazylǵan kitapsha jáne taǵy basqa zattar tárkilendi.
Jazıra Jylqyshıevanyń aıtýynsha, búginde Astana boıynsha 11 emxananyń 086 úlgisindegi medıtsınalyq anyqtamany berýge ruqsaty bar. Ótken jyly atalǵan mekemelerde 30 myńǵa jýyq anyqtama berildi. Árbir anyqtamanyń baǵasy - 7 myń teńge.
«Kúni keshe Astana qalasy boıynsha sybaılas jemqorlyqqa qarsy kúres departamenti medıtsınalyq anyqtamalardy qoldan jasap kelgen qylmystyq topty ustady. Olar óz úılerinde jalǵan medıtsınalyq qujattardy jasaǵan. Endi qarańyz, dál osy jaǵdaıda kúnine 10 jalǵan medıtsınalyq anyqtama berilip otyrdy. Sonda bir ǵana qylmystyq top jylyna 3 650 anyqtama jasaı alady. Demek, Astananyń emxanalary bir jyldyń ishinde 25 550 000 teńgeden qaǵylyp otyr. Ol - tek 086 úlgisindegi anyqtamanyń shyǵyny ǵana», - dedi J.Jylqyshıeva Astanada ótken baspasóz máslıxatynda.
