«007: Spektr» fılminiń qazaq tilindegi nusqasynyń aldyn ala kórsetilimi ótti
«007: Spektr» fılmi 2011 jyldan bergi otandyq kınoteatrlarda memlekettik tilde shyǵatyn 12-shi kınokartına jáne 2015 jyldyń 3-shi kınopremerasy bolyp tabylady. «Bolashaq» qaýymdastyǵy bes jyldan bergi kezeńde álem deńgeıine tanylǵan kınotýyndylar men anımatsııalyq fılmderdi qazaq tiline aýdarý bastamasyn tabysty iske asyryp keledi. Osy jyldar ishinde 11 gollıvýdtyq blokbaster memlekettik tilge aýdarylyp, dýblıajdaldy.
Tuńǵysh ret qazaq tilinde dybystalǵan fılmderdiń qatarynda «Kólikter-2», «Batyl júrek», «Monstrlar ýnıversıteti», «Galaktıka saqshylary», «Kúlsheqyz», «Kek alýshylar: Altron dáýiri» jáne t.b. syndy álemniń kınosúıer qaýymy joǵary baǵa bergen týyndylar bar. Qazaq tiline dýblıajdalǵan fılmniń tanystyrylymyna qatysqan «Nur Otan» partııasy Tóraǵasy birinshi orynbasarynyń keńesshisi Berik Qurmanǵalı osyndaı ıgi bastamaǵa «Nur Otan» partııasy byltyrǵy jyldan beri qoldaý bildirip, otandyq kınoteatrlarda qazaq tilinde kórsetiletin fılmder úlesin arttyrýǵa septigin tıgizip jatqandyǵyn jetkizdi. Osy jobanyń arqasynda qazaq tili áıgili Columbia Pictures kınokompanııasy ázirlegen fılmderdi dýblıajdaýda 7-shi álemdik til bolyp bekitilse, ataqty Walt Disney stýdııasynda jasalǵan fılmderdi dýblıajdaýda 7 myń álem tilderiniń ishinde 39-shy orynda tur. Sondaı-aq B.Qurmanǵalı memlekettik tildiń bedelin arttyrýǵa baǵyttalǵan jobany qolǵa alyp, óz deńgeıinde iske asyrýǵa belsene kirisken barsha uıymdastyrýshylarǵa partııa atynan alǵys bildirdi. «007: Spektr» fılminiń qazaq tilindegi nusqasynyń aldyn ala kórsetilimi Almaty qalasynda da ótti.
