ІІІ Qazaqstan mýzeıleri kongresi: elimizde restavratsııa isi jandanady
ASTANA. KAZINFORM – Elordadaǵy QR Ulttyq mýzeıinde ІІІ Qazaqstan mýzeıleri kongresi bastaldy.
Bul is-shara ǵylym, mádenıet jáne mýzeı isi ókilderi arasynda teorııalyq jáne tájirıbelik málimetterdi almasýǵa arnalǵan kásibı alań sanalady. Oǵan Belarýs, Qazaqstan, Qyrǵyzstan, Moldova, Ózbekstan, Reseı, Túrkııa jáne Túrikmenstan restavratorlary men mýzeı isiniń mamandary, ǵylym men mádenıet salasyndaǵy jetekshi sarapshylar men zertteýshiler qatysyp jatyr.
— Bıylǵy kongresimizdiń taqyryby mýzeı eksponattarynyń restavratsııa jáne konservatsııa jumysyna arnalyp otyr. Munda óńirlik mýzeılerdiń basshylaryn shaqyryp otyrmyz, óıtkeni restavratsııa máselesi elimizde óte ózekti. Tájirıbe máselesine qatysty sharalar zerthanalarda ótedi. Onda óte ejelgi dáýirdiń eksponattary bar. Mysaly, qola ǵasyryna jatatyn úgitilýge shaq turǵan qylyshymyz bar. Odan bólek matadan jasalǵan buıymymyz bar. Olardy tipti biz ustaýǵa múmkindigimiz joq. Solardy mata, metall, aǵash mamandaryna kórsetip, qalaı qalpyna keltire alatynymyzdy talqylaımyz. Bul bizge zor tájirıbe bolady, - dedi tarıh ǵylymdarynyń doktory, professor, QR Ulttyq mýzeıi dırektorynyń ǵylymı jumystary jónindegi orynbasary Aqmaral Ibraeva.
Kongress QR Mádenıet jáne aqparat mınıstrliginiń jáne «TÚRKSOI» túrki mádenıetiniń halyqaralyq uıymy qoldaýymen ótip jatyr jáne 3 kúnge jalǵasady. Onyń aıasynda 5 paneldik sessııa ótedi. Olar:
I paneldik sessııa – «Arheologııalyq zattardy konservatsııalaý jáne restavratsııalaý»;
ІI paneldik sessııa – «Arheologııalyq zattardy konservatsııalaý jáne restavratsııalaý ádisteri» praktıkýmy;
III paneldik sessııa – «XVIII-XX ǵǵ. mádenı murany saqtaý» atty semınar-trenıngi;
IV paneldik sessııa – «XVIII-XX ǴǴ. mádenı murany saqtaý» taqyrybyndaǵy sheberlik saǵattary;
V paneldik sessııa – «Mýzeı isi jáne tarıhı-mádenı mura» forýmy.
Atalǵan jıyn osymen úshinshi ret ótip jatyr. 2023 jyly ótken alǵashqy kongress aıasynda 60-qa jýyq mýzeıden 200-ge tarta maman qatysty.
2024 jyly shara halyqaralyq formatqa ótip, 12 elden 100-den astam zertteýshi keldi. «Mýzeologııa: Qazaqstan – Frantsııa» halyqaralyq forýmy ótip, Lývr bastaǵan Frantsııanyń jetekshi mádenı jáne ǵylymı mekemeleri óz tájirıbelerimen bólisti.
Aıta keteıik, Qazaqstan mýzeıleriniń qorynda 4,5 mıllıonnan astam qundy jádiger bar.