ІІ Halyqaralyq qýyrshaq festıvaliniń jeńimpazdary anyqtaldy
ALMATY. KAZINFORM — Almatyda «Almaty Puppet Festival — 2024» qýyrshaq teatrlarynyń II Halyqaralyq festıvali aıaqtaldy, ol Qytaı, Polsha, Chehııa, Bolgarııa, Grýzııa, Túrkııa, Ázirbaıjan, Ózbekstan, Reseı, Bashqurtstan jáne Qazaqstannyń 15 úzdik qýyrshaq ujymyn biriktirdi.
Bas júlde Aqtóbe oblystyq «Alaqaı» qýyrshaq teatryna buıyrdy. Rejısser Anton Zaıtsevtiń «Jomart aǵash» qoıylymy «Úzdik spektakl» dep tanyldy.
«Úzdik akterlik ansambl» syılyǵy «Alenkıı tsvetochek» spektaklin sahanalaǵan «Skarabeı» (Reseı) balalardyń Qum jáne kóleńke teatryna tabystaldy.
Ankaradaǵy (Túrkııa) «Tempo» teatrynyń «Alyptyń baǵynda» qoıylymy «Sheberligi men adaldyǵy» úshin syılyǵymen marapattaldy. Bul teatr dástúrge degen tereń qurmet pen sheberliktiń joǵary deńgeıin kórsetti.
«Úzdik qýyrshaq jasaýshy» nomınatsııasynda Chýn Feı Chengtiń jetekshiligimen «Qytaı dástúri» qoıylymymen «Sky Bird» qýyrshaq kompanııasy (Gonkong, QHR) jeńiske jetti.
«Innovatsııalyq kózqaras» atty arnaıy syılyq Bashqurt memlekettik qýyrshaq teatryna buıyrdy.
Negizgi konkýrstyq baǵdarlamadan basqa, festıval aıasynda sheberlik synyptary men shyǵarmashylyq kezdesýler ótti, olar bilim men tájirıbe almasýdyń mańyzdy platformasyna aınaldy.
Quralaı Eshmuratova, Nıkoloz Sabashvılı jáne Evgenıı Ibragımov ótkizgen kezdesýler qatysýshylardy shabyttandyryp, qýyrshaq óneriniń damýyna jańa serpin berdi.
«Men bul festıval halyqaralyq mádenı baılanystardy nyǵaıtyp, bizdiń ádemi Almaty qalasynyń mádenı ımıdjin qalyptastyrýǵa óz úlesin qosqanyna senimdimin», — dep atap ótti Almaty qalasy mádenıet basqarmasynyń basshysy Ǵanı Maılıbaev jabylý saltanaty barysynda.
Osyǵan deıin Almaty Memlekettik qýyrshaq teatry Belarýs jáne Grýzııa elderinde ótken halyqaralyq festıvalderde birneshe márte jeńiske jetkeni týraly jazǵan edik.
