Nurǵısa Tilendıev atyndaǵy respýblıkalyq dırıjerler baıqaýy ótedi
Almatyda dırıjerler arasynda Nurǵısa Tilendıev atyndaǵy respýblıkalyq konkýrs ótedi, dep habarlaıdy QazAqparat tilshisi.
Dırıjerler baıqaýy Mádenıet jáne aqparat mınıstrliginiń qoldaýymen Jambyl atyndaǵy Qazaq memlekettik fılarmonııasynda 20-22 qyrkúıek aralyǵynda ótedi.
Uıymdastyrýshylardyń aıtýynsha, konkýrs talantty jas dırıjerlerdiń basyn qosyp, bir-biriniń ónerimen jaqynyraq tanysýyna, tájirıbe almasýyna zor múmkindik beredi.
«Konkýrstyń basty maqsaty – qazaq dırıjerlik ónerin damyta otyryp, daryndy jastardyń kásibı sheberligin ushtaý, atalǵan salada jańa esimderdi anyqtaý jáne Qazaqstannyń mádenı ımıdjin arttyrý», - dedi Jambyl atyndaǵy Qazaq memlekettik fılarmonııasynyń dırektory, Qazaqstannyń eńbek sińirgen qaıratkeri Aqan Abdýalıev.
Eki kezeńnen turatyn baıqaýǵa elimizdiń ár óńirinen 18 – 35 jas aralyǵyndaǵy 19 úmitker, onyń ishinde joǵary oqý oryndarynyń stýdentteri qatysady. Jalpy, 25 ótinim kelip túsken. Júlde qory – 4,5 mln teńge.
Konkýrs nátıjesi 22 qyrkúıekte belgili bolady.
«Biz konkýrstan bólek is-shara josparlap otyrmyz. Ákemniń eskertkishine gúl qoıý rásimin ótkizip, baıqaýǵa qatysýshylardy ózi turǵan mýzeı-úıine aparamyz», – deıdi N. Tilendıev atyndaǵy «Otyrar sazy» akademııalyq folklorly-etnografııalyq orkestriniń bas dırıjeri Dinzýhra Tilendıeva.
