Shymkentte qasaqana adam óltirgen kúdiktige halyqaralyq izdeý jarııalandy

Shymkentte adam óltirgen toptyń bir múshesi izdestirilýde, dep habarlaıdy QazAqparat tilshisi.

1986 jyly týǵan Túrkistan qalasynyń turǵyny Tájibaev Erlan Abdýllaulyna halyqaralyq izdeý jarııalandy. Ol, 2012 jyly qymbat markaly avtokólikti ıemdený úshin tanystarymen aldyn ala sózbaılasyp, Shymkent qalasy Temirlan tas jolynyń boıynda beıtanys er adamdy qasaqana keýde tusynan atyp óltirgen.
Tártip saqshylary atalǵan jaıtty «Adamdar tobynyń aldyn ala sózbaılasýymen jasalǵan adam óltirý» boıynsha tirkep, jedel izdestirý jumystaryn júrgizdi. Nátıjesinde, sybaılastardyń úsheýi Shymkent, Taraz, Túrkistan qalalarynda ustalyp, qamaýǵa alyndy. Alaıda, Tájıbaev Erlanǵa qatysty júrgizilgen izdeý jumystary oń nátıje bermeı otyr.

«Qazirgi tańda halyqaralyq izdeý jarııalandy. Sondyqtan, sýrette kórsetilgen er adamdy kórgen-bilgender bolsa birden polıtsııanyń «102» arnasyna nemese 8-7252-97-66-44, 8701-555-28-06, 8775-777-23-05 baılanys nómirlerine habarlasýyńyzdy suraımyz»-delingen Shymkent qalasy polıtsııa departamentiniń baspasóz qyzmeti taratqan aqparatta.