Vera Kım Májilistegi ekologııa komıtetiniń quramyna saılandy

Búgin Májilistiń jalpy otyrysynda Vera Kım palatanyń turaqty komıtetiniń quramyna saılandy, dep habarlaıdy QazAqparat tilshisi.

Atap aıtqanda, jalpy otyrys barysynda palata depýtattary Vera Aleksandrovna Kımniń Ekologııa máseleleri jáne tabıǵat paıdalaný komıtetiniń múshesi retinde saılaý usynysyn qoldady.

Budan buryn habarlanǵandaı, jaqynda «AMANAT» partııasy Májilis depýtatynyń bos laýazymyna Vera Kımdi usyndy.

19 qyrkúıek kúni Ortalyq saılaý komıssııasy V.Kımdi Parlament Májilisiniń depýtaty retinde tirkedi.

Ol osyǵan deıin 2021 - 2023 jyldar aralyǵynda «AMANAT» partııasy atynan Májilistiń VII shaqyrylym depýtaty boldy.

Vera Aleksandrovna Kım 1982 jyly Pavlodar oblysynda dúnıege kelgen.

2003 - 2012 jyldar aralyǵynda Pavlodar qalalyq áleýmettik-volonterlik ortalyǵynda, «Áleýmettik-volonterlik ortalyǵy» jastar qoǵamdyq birlestiginde, «Qazaqstannyń Azamattyq alıansy» zańdy tulǵalar birlestiginde túrli qyzmet atqardy.

2012 jyly «Ulttyq volonterlik jelisi» zańdy tulǵalar birlestiginiń tóraǵasy boldy.

2017-2021 jyldary – «Zhasproject» jastar korpýsyn damytý jobasynyń úlestirý agenttiginiń basshysy.