Erevan polıtsııasy narazylyq aktsııasyn taratý úshin arnaıy tehnıka qoldandy
Erevanda polıtsııa Armenııa úkimeti ǵımaratynyń mańynda narazylyq bildirýshilerdi taratý úshin arnaıy quraldardy qoldandy. Buǵan deıin jurtshylyq el úkimeti ǵımaratynyń janyndaǵy Respýblıka alańyna jınalyp, Qarabaqtaǵy jaǵdaıdyń shıelenisýine baılanysty premer-mınıstr Nıkol Pashınıannyń otstavkaǵa ketýin talap etti. Armenııanyń quqyq qorǵaý organdary azamattardy zańsyz áreketterden aýlaq bolýǵa shaqyrady. Bul týraly QazAqparattyń menshikti tilshisi habarlaıdy.
Qarabaqta áskerı jaǵdaıdyń shıeleniskeni týraly habardan keıin Respýblıka alańyndaǵy Armenııa úkimetiniń ǵımaratynyń janyna narazylyq bildirýshiler jınala bastady.
Jınalǵan jurt áýeli Respýblıka alańyndaǵy aınalma jolda kólik qozǵalysyn jaýyp tastady. Olar bıliktiń Qarabaqqa qatysty saıasatyna narazylyq bildirip, premer-mınıstrdiń otstavkaǵa ketýin talap etti.
Sherýshiler men úkimet ǵımaratyn qorshap turǵan tártip saqshylary arasynda qaqtyǵys boldy. Sherýshiler polıtsııa qorshaýyn buzyp ótýge árekettendi. Tártip saqshylary dybys shyǵaratyn granatalardy qoldanǵan.
Eldiń quqyq qorǵaý organdary azamattardy zańsyz qadamdardan aýlaq bolýǵa shaqyryp, jaýapkershilik týraly eskertti.
Eske sala ketsek, 19 qyrkúıekte Ázerbaıjannyń Qorǵanys mınıstrligi Qarabaqtaǵy lańkestikke qarsy sharalar týraly habarlady. Óz kezeginde Armenııanyń Syrtqy ister mınıstrligi Ázerbaıjan tarapynan Qarabaqqa qarsy agressııa týraly málimdedi.
