Merdiger kompanııalarǵa qatań eskertý jasaldy
Jyl sońyna deıin áleýmettik nysandardyń, onyń ishinde mádenıet, bilim berý men densaýlyq saqtaý mekemeleriniń qurylysy, sýmen jabdyqtaý jelilerin qaıta jańǵyrtý jumystaryn ýaqtyly aıaqtaý qajet. Biraq keıbir jobalardy júzege asyrýda jospardan keshigý tirkelip otyr, dep habarlaıdy QazAqparat.
Osy baǵytqa jaýapty oblys ákiminiń orynbasary Dımıtrıı Garıkov oblystyń aýdan-qalalarynda qurylys júrgizip jatqan merdigerlerdiń basyn qosty. Birlesken keńeste qurylys jumystaryn belgilengen merzimde aıaqtaý talaptary qoıyldy. Kelisimshartqa sáıkes mindetterin oryndamaı jatqan kompanııa basshylary qatań synǵa alyndy. Eskertý aıtylyp, zań aıasynda sharalar qoldanylatyny jetkizildi.
«Sizder memlekettik satyp alý baıqaýynda jeńiske jettińizder, endi qujattarǵa sáıkes alǵan mindetterińizdi oryndańyzdar. Halyq sizderden nátıje kútip otyr. Jobalardy barynsha jyldam ári sapaly aıaqtaý maqsatynda barlyq tehnıka men jumys kúshin jumyldyryńyzdar. Qosymsha jumysshylar alyńyzdar. Alǵashqy aıaz túskenshe barlyq jumystar aıaqtalýy qajet», - dedi Dımıtrıı Garıkov.
Qurylys jumystary ýaqytynda aıaqtalmasa, túbegeıli sharalar qabyldanbaq. Merdiger kompanııalar qara tizimge engizilip, bolashaqta memlekettik satyp alýlar men qurylys baıqaýlaryna qatysýdan shettetiledi. Sondaı-aq, turaqsyzdyq úshin aıyppul óndirip alý jáne t.b. zań aıasynda jaýapqa tartý úshin sotqa júginedi.
