Soltústik jáne shyǵys óńirlerde jylytý maýsymy jyldaǵydan erte bastalýy múmkin

Bıyl soltústik jáne shyǵys óńirlerde jylytý maýsymy jyldaǵydan erte bastalýy múmkin. Bul jaıynda Premer-Mınıstr Álıhan Smaıylov Úkimet otyrysynda málim etti, dep habarlaıdy QazAqparat. 

«Jylytý maýsymynyń bastalýyna óte az ýaqyt qaldy. Soltústik jáne shyǵys óńirlerde jylytý maýsymy aýa-raıyna baılanysty merziminen erte bastalýy múmkin. Kórip otyrǵanymyzdaı, búgingi tańda jylytý maýsymyn bastaý úshin bastapqy daıyndyq bar», - degen úkimet basshysy daıyndyǵy kesteden keshigip jatqan óńirlerge toqtaldy.

"Sonymen birge, keıbir jylý kózderin jóndeý jumystary ýaqytynda aıaqtalmaı qalýy múmkin. Temirtaý qalasynyń №2 jylý elektr ortalyǵynda №4-shi qazandyqty jóndeý qazan aıynyń sońyna deıin uzartyldy.
Jezqazǵan jylý ortalyǵyndaǵy №4-shi qazandyqty josparly jóndeý áli aıaqtalǵan joq. Al №9 qazandyqta jumystardyń 4%-i ǵana oryndalǵan.
Abaı, Qostanaı, Shyǵys Qazaqstan, Jambyl oblystarynyń energııa kásiporyndarynda jóndeý jumystary kesteden keshigip júrgizilýde», - dedi Álıhan Smaıylov.

Sondaı-aq, ol bul keshigýler jylytý maýsymynyń basynda sonshalyq aýyrlyq túsirmeıtinin atap ótti.

«Jylytý maýsymynyń basynda qazandyqtarǵa túsetin júktemeniń tómen bolatynyn eskersek, bul úılerdegi temperatýra kórsetkishterine áser etpeý kerek.
Atalǵan óńir ákimderi Energetıka mınıstrligimen birge jóndeý jumystaryna kúndelikti monıtorıng júrgizip, aldaǵy maýsymda qajetti jylý berýdi qamtamasyz etýi tıis.
MAEK-te №3 energoblokty josparlanǵan kúrdeli jóndeý 2024 jylǵa aýystyryldy. Búginde №2 energoblokta avarııalyq jóndeý júrip jatyr
Ótken aptada men Mańǵystaý oblysynda bolyp, MAEK-tegi jóndeý jumystarynyń barysymen tanystym.
Óńir ákimdigi jóndeý jumystarynyń aıaqtalýy men kásiporynnyń turaqty jumysyn erekshe baqylaýda ustaýy qajet», - dedi Premer-Mınıstr.