Tarıhı jeńis: Rızabek Aıtmuqan erkin kúresten álem chempıony atandy

Erkin kúresten Rızabek Aıtmuqan (92 keli) álem chempıony atandy, dep habarlaıdy QazAqparattilshisi.

Serbııa astanasy Belgrad qalasynda kúres túrlerinen ótip jatqan álem chempıonatynda qazaqstandyq balýan fınalda Osman Nýrmagomedovpen kezdesti.

Kezdesý basynan balýandar bir-birine laıyqty qarsylyq kórsetti. Ázerbaıjandyq balýan ádis qoldanyp, alǵashqy upaıyn enshiledi. Odan keıin Rızabek ádis qoldanyp, tarazy basyn teńestirdi. Sońǵy sátte ol taǵy aılasyn asyryp, upaıyn molaıtty.

Nátıjesinde Rızabek Aıtmuqan qarsylasyn 4:2 esebimen jeńip, álem chempıony atandy. 

Aıta keteıik, Rızabek Aıtmuqan - erkin kúresten táýelsiz Qazaqstan tarıhyndaǵy tuńǵysh álem chempıony bolyp otyr.

Qarsylasy osal emes. 1998 jyly dúnıege kelgen ázerbaıjandyq balýan qazirge deıin álem chempıonatynda 2021, 2022 jyldarda qola júldeger atandy. Oǵan qosa Eýropa chempıonatynda bir márte kúmis, eki márte qola alǵan.

Rızabek Aıtmuqan fınalǵa deıingi tórt kezdesýdiń barlyǵynda jeńiske jetti. Aldymen vengrııalyq Balaj ıÝhasty 13:3 esebimen jeńse, odan keıin túrkııalyq Feızýlla Aktıýrkti 11:0 esebimen tize búktirdi.

Al jartylaı fınalda grýzııalyq Mırıanı Maısýradzeden basym tústi.

Endi el quramasynan Meırambek Qartbaı (57 keli) 3-oryn úshin synǵa túsedi.

Aıta ketsek, budan buryn álem chempıonatynda erkin kúresten Azamat Dáýletbekov (86 keli) qola júldeger atandy.