SQO shoshqa fermasyndaǵy 4 adamnyń qazasy: Jumys berýshiniń kinási 80% dáleldendi

Soltústik Qazaqstan oblysynda shoshqa ósiretin keshende mert bolǵan 4 jumysshyǵa qatysty tekseris qorytyndysy shyqty. Jumys berýshiniń kinási 80% dáleldendi, dep habarlaıdy QazAqparat tilshisi.

SQO Memlekettik eńbek ınspektsııasy basqarmasynyń málimetinshe, ýákiletti organ tergeý júrgizip, Taıynsha aýdany Novoıvanovka eldi mekenindegi shoshqa kesheninde bolǵan oqıǵaǵa kimniń kináli ekenin anyqtady. Esterińizde bolsa, tamyz aıynyń basynda shoshqa bordaqylaý alańynda 8 metrlik káriz qudyǵyn tazalaý kezinde tórt jumysshy, aldyn ala boljam boıynsha, ýly gazǵa tunshyǵyp mert bolǵan edi.

«Jumys berýshiniń kinási 80% dáleldendi. Tehnologııalyq protsesterdiń saqtalmaǵandyǵy, eńbek qaýipsizdigi boıynsha oqytýdyń jetkiliksizdigi, jumystyń jetkilikti deńgeıde uıymdastyrylmaýy, jumysshylardyń jeke jáne ujymdyq qorǵaný quraldarymen qamtamasyz etilmeýi, mashına, qondyrǵy, mehanızmderdiń jetkiliksizdigi anyqtaldy. Al qalǵan 20% - qaza tapqan jumysshylardyń qaýipsizdik erejelerin óreskel túrde saqtamaýynan. Olar qorǵaný quraldarynyń bir bóligimen qamtylǵan, biraq ony jumys barysynda qoldanbaǵan», - deıdi basqarmanyń eńbekti qorǵaý jáne qaýipsizdikti baqylaý bóliminiń basshysy Azat Kúsherbaev.

Іs materıaldary aýdandyq polıtsııa bólimine jiberildi.