Aqtaýda izdeýde júrgen, sottalǵan adam tabyldy
Mańǵystaý oblysy boıynsha Qylmystyq-atqarý júıesi departamentiniń qaýipsizdigi barynsha tómen mekemesinde jazasyn óteýshi, izdeýde júrgen B.Іzbergenov Aqtaý qalasynan tabyldy. Bul týraly Qylmystyq-atqarý júıesi departamentiniń baspasóz qyzmetinen málim etti, dep habarlaıdy QazAqparat tilshisi.
«Aqtaý qalasynyń aýmaǵyndaǵy jeke kásiporyndardyń birinde jumys istep júrgen ol kolonııaǵa belgilengen ýaqytta kelmeı qalǵan. Departament qyzmetkerleri jedel izdestirý sharalary barysynda sottalǵan adamdy taýyp, kolonııaǵa qaıtardy», – delingen baspasóz málimetinde.
Sottalǵan B.E.Іzbergenov 1982 jyly týǵan. Ony 2018 jyly qyrkúıek aıynda Munaıly aýdandyq soty QR Qylmystyq kodeksiniń 124-baby ıaǵnı «Jas balalardy azǵyndyq jolǵa túsirý» boıynsha 7 jylǵa bas bostandyǵynan aıyrýǵa úkim shyǵarǵan. 2023 jyldyń maýsym aıyna deıin Atyraý oblysy boıynsha Qylmystyq-atqarý júıesi jalpy rejımdegi kolonııasynda jazasyn ótegen.
Sodan keıin Atyraý qalasy sotynyń qaýlysymen Mańǵystaý oblysy boıynsha Qylmystyq-atqarý júıesi departamentiniń qaýipsizdigi barynsha tómen mekemesine aýystyrylǵan. Aıta keteıik, Qazaqstan Respýblıkasynyń qylmystyq-atqarý zańnamasyna sáıkes qaýipsizdigi barynsha tómen mekemesinde jazasyn óteýshiler eger qajet bolsa ákimshiliktiń ruqsatymen mekemege irgeles aýmaqtyń sheginde qadaǵalaýsyz júrýge quqyly.
