Qazaqstandyqtar 15 qarashaǵa deıin qalaǵan emhanasyna tirkele alady
Jyl saıyn elimizde 15 qyrkúıekten 15 qarashaǵa deıin emhanany erkin tańdaý naýqany ótedi. Bul rette elordalyq qoǵamdyq densaýlyq saqtaý basqarmasy basshysynyń orynbasary Aınur Tóleýova emhana tańdaý jáne tirkelý jóninde aqyl-keńes berdi, dep habarlaıdy QazAqparat tilshisi.
«Bul azamattarǵa qaralyp júrgen emhanasyna kóńili tolmaıtyn nemese turǵylyqty mekenjaıyn aýystyrǵan jaǵdaıda nemese basqa sebepterge baılanysty emdeý mekemesin tańdaýǵa múmkindik beredi. Biraq munda turǵylyqty aýmaq shegin umytpaǵan jón. Máselen Astanada 5 aýdan bolsa, ár adam óz aýdanyndaǵy emhanalar arasynda tańdaý jasaı alady. Úı jaǵdaıynda medıtsınalyq kómekti de emhana óziniń qyzmet kórsetý aýmaǵynda júzege asyrady. Sondyqtan, kishkentaı balasy barlar, júkti áıelder, múmkindigi shekteýli jandar osyny eskerýi kerek. Olarǵa konsýltatıvti-dıagnostıkalyq kómek, kúndizgi statsıonar jáne áleýmettik kómek kórsetiledi», - dedi A. Tóleýova Astana Kommýnıkatsııalar qyzmetinde ótken brıfıngte.
Patsıent qyzmetter paketin 2024 jyldyń 1 qańtarynan bastap ala bastaıdy, ıaǵnı 31 jeltoqsanǵa deıin buryn tirkelgen emhanaǵa qaralýdy jalǵastyrady.
«Emhanaǵa tirkelý joldary ózgergen joq. Onyń 2 túrli tásili bar. Birinshisi – «Elektrondy úkimet» veb-portaly arqyly «medıtsınalyq-sanıtarlyq kómek kórsetetin medıtsına uıymdaryna tirkeý» qyzmetin paıdalaný, ekinshisi – emhanaǵa baryp, ótinish jazý arqyly tirkelý. Aıta ketetin jaıt, ekinshi tásildi zeınetkerler, múgedekter, bala kezden múgedek azamattardyń qamqorshylary, túrmede jazasyn ótep jatqandar, stýdentter, áskerı boryshyn ótep jatqandar, shetelde týǵan balalar men senimhat arqyly tirkeletin azamattar paıdalana alady», - deıdi Aınur Tóleýova.
Sondaı-aq, naýqas basqa eldimekende (issaparda, qonaqta) aýyryp qalsa, shuǵyl medıtsınalyq kómek alý úshin jaqyn mańdaǵy medıtsınalyq uıymǵa júgine alady nemese jedel medıtsınalyq járdem brıgadasyn shaqyra alady.
