Qasym-Jomart Toqaev Slovenııa prezıdentin Astana halyqaralyq forýmyna qatysýǵa shaqyrdy

Memleket basshysy Slovenııa Prezıdenti Natasha Pırts-Mýsarmen kelissóz júrgizdi, dep habarlaıdy QazAqparat Aqordanyń baspasóz qyzmetine silteme jasap.

Memleket basshysy Slovenııany Qazaqstannyń Eýropalyq Odaqtaǵy mańyzdy seriktesi ekenin atap ótti. Prezıdenttiń aıtýynsha, eki eldiń qarym-qatynasy qarqyndy damyp keledi.

Qasym-Jomart Toqaev Natasha Pırts-Mýsardy kelesi jyly elimizde ótetin Astana halyqaralyq forýmyna qatysýǵa shaqyrdy.

– Men sizdi Qazaqstanǵa saparmen kelýge resmı túrde shaqyramyn. Kelesi jyly maýsym aıynyń ortasynda elimizde Astana halyqaralyq forýmy ótedi. Onda saıasat jáne ekonomıka máseleleri talqylanady. Bıylǵy maýsym aıynda ótken forým óte tabysty boldy. Ózge memleketterdiń basshylary, premer-mınıstrleri, sondaı-aq kóptegen transulttyq kompanııalardyń jetekshilerimen birge Siz de atalǵan forýmnyń negizgi spıkerleriniń biri bolasyz dep úmittenemin, – dedi Qasym-Jomart Toqaev.

Prezıdentter Qazaqstan men Slovenııanyń saýda-ekonomıkalyq, kólik-logıstıkalyq jáne gýmanıtarlyq salalardaǵy yqpaldastyq perspektıvalaryn talqylady. Sondaı-aq áńgimelesý barysynda farmatsevtıka, logıstıka jáne IT ındýstrııasy salalaryndaǵy ózara baılanystardyń oń tájirıbesine nazar aýdaryldy.

Slovenııa Prezıdenti Qazaqstanmen aradaǵy yntymaqtastyqty damytýǵa daıyn ekenin rastady

– Yntymaqtastyqty nyǵaıtýǵa árdaıym múmkindik bar. Bizdiń elderimiz arasynda eshqandaı túıtkildi másele joq. Men de Sizdi elimizge arnaıy saparmen kelýge shaqyramyn, – dedi Natasha Pırts-Mýsar.

Taraptar halyqaralyq máseleler boıynsha da pikir almasty. Atap aıtqanda, álemdegi turaqtylyq pen qaýipsizdikti qamtamasyz etý, BUU qurylymyn jetildirý máseleleri qarastyryldy. Sonymen qatar memleketter basshylary Ortalyq Azııa men Qazaqstannyń halyqaralyq arenadaǵy róliniń artyp kele jatqanyn atap ótti.

Prezıdentter halyqaralyq qurylymdar aıasynda ózara tyǵyz qarym-qatynas jasaý jóninde ýaǵdalasty.