Almatyda kóshede túkirgen 70-ten astam adamǵa aıyppul salyndy

Almatyda qoǵamdyq ortada túkirgeni úshin 71 adamǵa jarty mln teńgege jýyq aıyppul salyndy, dep habarlaıdy QazAqparat tilshisi.

Almatylyqtar qoljetimdi baılanys arnalary arqyly polıtsııaǵa usaq quqyq buzýshylyqtar týraly habarlap otyrady. Onyń ishinde adamdardyń qoǵamdyq oryndarda túkirý deregi kóp kezdesedi. Bul týraly Almaty qalalyq polıtsııa departamentiniń jergilikti polıtsııa qyzmeti basqarmasynyń basshysy Erjan Uzaqbaev aıtty.

«Jyl basynan beri «102» qosymshasy arqyly azamattardan 10 myńǵa jýyq habarlama túsken. Eń jıi kezdesetini – adamdardyń qoǵamdyq oryndarda túkirýi. Almatyda polıtseıler 11-15 qyrkúıek aralyǵynda qoǵamdyq oryndardy lastaýdyń 257 deregin anyqtasa, onyń 71-i – kóshede túkirgender. Aıyppul somasy – 433 myń teńge», – dedi Erjan Uzabaev.

Ol sondaı-aq qoǵamdyq oryndarda túkirgender QR ÁQBtK-niń 434-2 babymen jazalanatynyn eske saldy.

«Bul quqyq buzýshylyqtardy jasaǵan azamattardyń qoǵamdyq oryndarda tárbıesi men ózin-ózi ustaý mádenıetiniń tómendiginiń belgisi sanalady. Sonymen qatar qoǵamdy syılamaýshylyq pen qorshaǵan ortaǵa mensinbeýshilik tanytýy. Buzýshylyqqa jol bergen adam ákimshilik jaýapqa tartylady. Azamattardy tártipti saqtaýǵa, zańdy buzbaýǵa shaqyramyn. Qoǵam birlese otyryp, qalamyzdyń tabıǵı qundylyqtary men moraldyq-mádenı kelbetin saqtaı alady. Al Almaty Qazaqstannyń qarjy-ekonomıkalyq jáne mádenı ortalyǵy retinde tek azamattardyń kómegimen óz mártebesin, jaqsy ımıdjin saqtap qalýy kerek», – dedi Almaty qalalyq polıtsııa departamentiniń jergilikti polıtsııa qyzmeti basqarmasynyń basshysy Erjan Uzabaev.