«Astana qylyshy»: semserlesýden ashyq týrnır ótedi
Elordada ótetin sporttyq jarysqa elimizdiń birneshe óńirinen semserlesýshiler qatysady, dep habarlaıdy QazAqparat tilshisi.
Semserlesýden ashyq týrnır 23-28 qyrkúıek elordadaǵy «Aspan» sport kesheninde ótedi. Jarysta Astanadan bólek, Almaty, Shymkent qalalary jáne Qaraǵandy, Jambyl, Almaty oblysy, ShQO, SQO jáne Abaı oblystarynan sportshylar baq synaıdy.
«Sporttyq básekeniń biregeıligin kórsetý úshin medaldar, kýboktar men marapattar arnaıy brendpen ázirlenip, daıyndalyp jatyr. Jarys baǵdarlamasyna shpaga (sapy) túrinen uldar men qyzdar jarysy, rapıra (naıza) túrinen uldar men qyzdar jarysy, sablıa (qylysh) túrinen uldar men qyzdar jarysy kiredi. Jarys eki kategorııada ótedi. Birinshi 2007-2012 jyly týǵan uldar men qyzdar. Ekinshisi 2010 jylǵy jáne odan jas uldar men qyzdar básekesi», - dedi Astana qalasy ákimdiginiń №9 balalar men jasóspirimderdiń sport mektebiniń basshysy Aıdyn Toqbaev kommýnıkatsııalar qyzmeti alańynda ótken baspasóz máslıhatynda.
Uıymdastyrýshylardyń aıtýynsha, atalǵan is-sharanyń maqsaty – semserlesý sportyn keńinen nasıhattaý, oǵan jańa sportshylardy tartý jáne daryndy jas semserlesýshilerdi qoldaý.
Sondaı-aq ashyq týrnır jas sportshylardyń tájirıbe jınaqtap, shıraýyna jol ashady.
