DSM Talǵarda dárigerlerdi soqqyǵa jyqqandardy jazalaýdy talap etti

Densaýlyq saqtaý mınıstrligi Talǵar aýdandyq ortalyq aýrýhanasynda qyzmetin atqaryp júrgen medıtsına mamandaryna jasalǵan zorlyq-zombylyqqa pikir bildirdi, dep habarlaıdy QazAqparat tilshisi.

Reanımatolog pen meıirger patsıenttiń agressıvti týystarynyń shabýylynan aýyr jaraqat aldy.

«Osy áreketke quqyq qorǵaý organdary tarapynan tıisti baǵa berilip, shabýyl jasaǵan adamdar zań talaptary boıynsha jazalanýǵa tıis. Dárigerlerge jasalǵan mundaı qaskúnemdik shabýyl, aýyr patsıentterge medıtsınalyq kómek kórsetetin aýrýhananyń jumysyna aralasýǵa múldem jol berilmeıdi jáne adamgershilikke jatpaıdy»,- dep atap ótti mınıstrlikten. 

Vedomstvo málimetinshe, densaýlyq saqtaý júıesinde patsıentter men dárigerlerdiń qaýipsizdigi, naýqastarǵa medıtsınalyq kómek kórsetý úshin jaǵdaı jasaý árqashan aldyńǵy qatarda turady.

«Basym mindet - zardap shekken dárigerdiń jáne basqa qatysýshylardyń qaýipsizdigin qamtamasyz etý, búkil kúsh-jigerdi zardap shekken medıtsına qyzmetkerleriniń ómiri úshin kúreske baǵyttaý, al medıtsınalyq uıymda basqa shuǵyl patsıentterge kómek kórsetý úshin qaýipsiz jaǵdaı jasaý. Áriptesterimizdiń tezirek saýyǵyp ketýine tilektespiz»,- delingen habarlamada.

Densaýlyq saqtaý mınıstrligi medıtsına qyzmetkerleriniń mindetin oryndaý kezinde olarǵa zorlyq-zombylyq jasalǵan jaǵdaıda qylmystyq jaýapkershilikke tartylyp, medıtsına qyzmetkerlerin quqyqtyq qorǵaý, qaýipsizdik jáne mártebesin nyǵaıtý bastamasyn kóteredi.

Zańnamaǵa engizilgen ózgerister Parlament Májilisinde qaralady.

Buǵan deıin Talǵar aýdandyq aýrýhanasynda ákesiniń qaıtys bolǵanyn estigen uldary medıtsına qyzmetkerlerine kúsh kórsetip, marqumnyń denesin alyp ketkenin jazǵan bolatynbyz.